Lunglei Thalai Pawl chuan PMGSY hnuaia Thuampui leh Lungchem inkara kawng laih mek an enfiah a, contractor-te chu a rang thei ang ber an hna thawk zo thuai turin an ngen.
Lunglei Thalai Pawl hian February 20, 2022-a Thuampui leh Lungchem inkar kawng laih mek an enfiah chungchangah thuchhuah siamin, he kawngpui, km 40 chuanga thui, Rs. nuai 3,465.01 sen ralna tura ruahman hi package 11-ah thenin contractor pariatten an inthawh tawm tih leh kum 2018 chhunga thawh zawh vek tura ruahman a nih thu an sawi.
Package 11 atangin package rukte chu extension vawi eng emaw zat dil a nih hnuah zawh theih hram a ni a, package pangate chu tun thlengin thawh zawh lohin a la awm tiin, “Contractor-ten hun tiam chhunga an hna chanpual an thawk zo thei lo vek leh tun thlenga kawng siam zawh a la ni lo chu hriatthiam theih chi niah kan ngai lo,” an ti.
Lunglei Thalai Pawl chuan Thuampui leh Lungchem inkara kawng la sial zo lotu contractor-te chu a rang thei ang bera hna thawk zo thuai tur te, kawng zau zawng tling lo lai tam tak awmte siam thaa khawl hman tlak chauh hmang tur leh culvert leh retaining wall a nih dan tur tling loa siamte thiata siam tha leh vek turin an ngen a ni.
Kawng siam hnathawh chungchangah a nih dan tur ang tak a thawh a nih theih nana viltu department engineer-te vau an ni thin leh transfer an ni thin chu pawi an tih thu leh ruling sorkarna hmachhuana hetianga mi inluling an awm thin chu an dem tak zet tih an sawi.
Hetianga mi thiltithei nia inhriate do let tur leh thlavang hauh ngaite thlavang hauh tura hma an lak zel tur thu Lunglei Thalai Pawl chuan an sawi bawk.