PC party-in P&E deptt-ah tul lova rawih mi 973 an awm thu thuchhuaha siama an tarlan chu MNF party-in “Hei hi thu dik tawklo a ni” tia an chhanlet hnuah PC party chuan MNF party chu debate neihpuiah sawmin, nimin khan MNF president Zoramthanga hnenah debate puia sawmna chu ziakin an thlen.
PC party chuan P&E department-a thawk mi 973 te chu thuneitute duhsak zawng te an nih avanga ṭul lo leh mamawh lo chunga lak an nih thu bakah hei vang hian mipuite thlatin eng chhit man a pung niin thuchhuah siamin an lo tarlang tawh a. MNF party-in an thuchhuah chhanga PC party chu thubelhchiandawllo sawia an puh chungchangah mipuiin thudik ziktluak an hriat theihna tura debate neihpuiah MNF party chu an sawm ta niin an sawi.
“Mizoram sorkarin power department a enkawl dan chungchangah MNF party-in mipuite thudik zawk hriattir an duh takzet a nih chuan thuchhuah hmanga insawifihlim tum mai lovin, TV kaltlanga live ngeia debate neih ṭul kan ti” PC party chuan an ti a. A rang thei ang bera inhmachhawnna platform buatsaih ni se an duh thu MNF president hnenah chuan an thlen niin an sawi.
PC party chuan P&E department kalphung chauh ni lovin, sorkar department hrang hrangte kalphung leh inrelbawl dan te pawh nasa taka an zir thu an sawi a. “Mipuiin thil awmzia kan hriata, kan hriatna hmanga sorkar khalh ngil tura mipuite kan thanharh zel theih nan theihtawp kan chhuah zel dawn a ni” an ti bawk.