ZPM party thalaiin Lengpui tihchangtlun hna thawh mek tihtawpa open tender hmanga hnathawktu tur zawn that leh an phut.
ZPM thalai chuan Lengpui airport tihchangtlun hna thawk mektu chu restricted tender hmanga thlan a nih thu leh a thawktu pawh Kâmlova Chhangte intia Mizo lemchang Kamrul Uddin Lasker a nih thu sawiin, Kamrula hi chief minister Zoramthanga nen inhnimhnai tak nia sawi a nih thu an sawi.
Kamrula chu a official address-ah pawh hmuh tur a awm loh thu leh ZPM thalaiin tun thla ni 11-a hmuh tuma an zawn pawhin an hmu zo lova, MSU pawhin an hmu zo lo niin ZPM thalai chuan an sawi a. He hnathawhnaah hian thil fello lian tak a awm nia an ngaih thu sawiin, “Kan sorkar hian mihring tak awm si lovin, mimal tu emaw hamṭhatna atan Kamlova hming hawh chawpin work order hi an chhuah ta em ni, tih sawifiah ngei turin sorkar kan phut” an ti bawk.
ZPM thalai chuan Lengpui airport cheiṭhat hna chu an vei hle nia sawiin, December ni 1, 2021 khan an tlawh tawh thu leh hemi ṭum hian airport cheiṭhat hna enkawltu engineer-te chu hmuh tur awm lovin an lo bibo tawh niin an sawi bawk a ni.