Aizawl North II bialtu MLA Dr. Vanlalthlana leh Aizawl North Development Society (ANDS)-in thawhdunna thuthlung an ziak a. He inremnaah hian ANDS-in MLA fund hmangin zirna, intodelhna leh hriselna kawngah hma an la dawn a ni.
MLA fund hmanga hna thawh turah te ANDS chu implementing agency-ah an tang ang a, tha taka MLA fund atanga hnathawh a nih theihna turin hnathawhte an enkawlsak ang.
ANDS hian Pathology laboratory, Common Facility Centre for Food Packaging Centre, Common Facility Centre for Bakery & Confectionary, Common Facility Centre for Home Trades leh Specialised Library for Central Services Examination project te an buaipui nghal dawn nia thudawn a ni.
Dr Vanlalthlana chuan bial mipuiten tangkai thei ang bera MLA fund an hman dan tur a ngaihtuah nasat thu sawiin, “Kum nga chhunga Rs. nuai 750 awm atang hian thalai ten thiam thil zirna leh intodelh duhte tana kawng buatsaih hi ngaih pawimawh a tul hle,” a ti a. Hetiang lama thawhpui tur society tha tak an awm chu lawmawm a tih thu leh MLA fund tangkai zawka hman a ni thei tur chu lawmawm a tih thu a sawi.
Thuziak leh lemziak thiamte hmanga sikul naupangte nungchang tha kawhhmuhna (moral reform) Comics an buatsaih mek thu leh a thuziak pawh peih a nih tawh thu Dr Vanlalthlana chuan a sawi bawk.