Finance Minister Zoramthanga chuan chhiah thar lak emaw, chhiah tihpun tumna emaw a awm loh thu a sawi.
Kum 2022-2023 Mizoram budget nimina a pharh zawhah thu thar thehdarhtute a kawm a. Budget pharh taka kum hmasa budget atanga chhiah (tax) hmuh beisei zat a pun chhan chu chhiah lak tur tihpun tumna a nih loh thu a sawi.
“Hnathawktu hrang hrang indaih lohna te, chhiah khawntuten an khawn that loh avanga tax revenue atanga sum kan hloh hi vaibelchhe tel tak meuh a ni. Hei hi siam that a nih chuan kan hloh let tel a hmuh theih dawn a ni,” a ti.
Finance minister chuan chhiah thar lak emaw, chhiah tihpun tumna emaw a awm loh thu a sawi a. Amaherawhchu sorkar laipui atanga thu a dang a nih chuan thuhran nise, tuna budget presentation-ah erawh hi chuan chhiah tihsan lam a nih loh thu a sawi a. “Chhiah tihsan pawh ni chuang loin, a khawn dan te, a khawntute active lehzualin, a petu tan pek dan awlsam lehzualin kal chho ila, kan resource hi nasa takin kan mobilise thei anga tih a ni. Chu chu kan kal tum dan a ni,” a ti a; chhiah tihpun lam a kawh loh thu a sawi.
Budget pharh takah sorkar kum tharah RBI atanga Ways & Means Advance (WMA) hi Rs. vbc. 1,000 tling tura chhut a ni chu sorkar invenna vang a nih thu te, kum kal ta aia hma a sawn viau nia an hriat thu sawi a ni.
Chief minister hian SEDP fund dawngtu turte chu veng, khua, state leh district-ah thlan chhuah an nih tur thu a sawi a. SEDP fund hmu turte chu trade an thlan an tihhlawhtlinna tura pek an nih tur thu sawiin, “A tlangpui thuah chuan a bul tanna Rs 50,000 kan pe ang; amaherawhchu, first batch-ah pawh thenkhat chu pek belh an awm dawn,” a ti a. Mipuiin hma an lak theihna turin selection committee-in an tih ang pek a nih tur thu a sawi.
Sorkar budget thara ram hmasawnna ruhrel, ram tana rotling (asset) siam chhuahna chungchangah, hmarchhak state zawng zawng hian sorkar laipui atanga an hmuh hi a tam ber tih a sawi a. “Hmarchhak state-te hian kan tih kan tih theih chin hi chu tlem a, kan kal ve ngawr ngawt vek mai a. Chuvangin, tunah pawh hian sorkar laipuiin hemi atan Rs vaibelchhe nuai khat an dah a. Eng emaw zat pawh kan asset siam nan hman theih ngei kan tum a. Capital expenditure pawh tihsan chhoh zel kan tum a ni,” a ti.
Ram tana rotling siamna hi hmarchhak state zawng zawng tan central-in sum tam tak a ruahman niin a sawi a. State tin hmasawnna tur sum sem rual hna an thawk ringawt tih sawiin, “Central feet 10 pawh India ah hian ram a nei lo, state tan vek a ni India zawng zawng hi,” a ti a. Project siam a a thawk chak chak pek an nih tur thu central-in an sawi niin a sawi a. Amaherawhchu, state-in a do let vena tur erawh a project azirin tum ve tur a awm thu leh a pawng pek ngawt loh thu a sawi a. Chumi behchhan chuan hmarchhak state dangte ang bawka kalpui an tum thu finance minister hian a sawi a ni.
Kamrul-a chungchangah zawhna chhangin Chief Minister Zoramthanga chuan, “Kamrul-a hian contract a hmu teuh a, Kamrul-a lo pawhin a hmu teuh bawk. Tunah hian PWD-a first class contractor kan neihte hian hna eng emaw zat an thawk a. Tlang takin sawi ta ila, an hming kan hawh a ni a,” tiin, hna a tak taka a thawh vek pawh a nih loh thu a sawi.
Zoramthanga hian, “Tun hma pawhin hming hawhin kan thawk tam em em a. Kamrula pawh kan duhsak bik a, kan duhsak lo bik pawh a ni lo. A thawktu hmingah an lo hmang a, chutia kal chho a ni a, a dang pawh mi thawh hi a tlar thui khawp mai,” a ti.