Benfica in an mikhual Ajax Amsterdam laka draw result nei turin second half-ah goal khung an mamawh a. An striker Roman Yaremchuk chuan an mamawh chhanna goal khungin 2-2 in an inhnehtawk.
Lisbon khawpui a Estadio da Luz a inkhelah Ajax goalkeeper Remko Pasveer chuan Goncalo Ramos ball pet kawh tak chu a dang a, mahse ball per hi Yaremchuk hian goal-ah a khung hman.
Ukraine international striker hi goal a khung zawhah yellow card pek a ni a. A goal khung a lawmnaah ‘Ukrainian coat of arms’ tarlanna kawr chu a jersey hnuaiah a ha a. Russia leh an ram inkar buainaah an ram a thlawpna a ti lang.
Ajax an huai mah mah?
Dutch champion lai hi coach Erik Ten Hag hnuaiah football hlauhawm, ball thununtu ni a attacking football khelh \hin an ni. Tun season Champions League group stage-ah hnehna an chang vek mai a ni lova, goal 20 an khung.
An striker rinrawl Sebastien Haller chuan tun season UCL inkhelah goal la khung kim vek chhunzawm turin minute thum chhungin goal hnih a khung a, a hmasa zawk an lamah a ti lut palh.
Minute 18-naah 4-3-3 a Haller thlawptu pahnih zing ami veteran Dusan Tadic chuan goal a khung a, full-back Noussair Mazraoui thawhrah sengin a volley lut mawi.
Minute 25-naah Benfica in goal an nei a, Haller-a’n an lama ball cross an goal-ah a ti lut palh a. A hnu lawkah erawh a tihsual siam\ha in kum 27 mi Ivorian striker in an hmahruaina goal a khung lehnghal.
Halftime zawhah Ajax in goal khung belh an tum a, Benfica an insiam\ha ve thung a, minute 72-naah Dutch club an chesual. Penalty beiseina an neihlaiin rang takin Benfica in an chhut let a, Yaremchuk-a’n goal a khung ta zawk.
Return leg hi Amsterdam-ah March 15-ah khelh a ni ang.
Ajax chak zawh loh chhanah kum 38 mi goalkeeper Remko Pasveer chetsual bakah Ten Hag-a’n si phurh sut tum Benfica in an bawh na telh telh chunga an inkhelh dan a siksawi duh lo chu \henkhatin an sawilang.
Inkhel zawhah Ten Hag chuan, “Ka rilruah thil pahnih a awm, result chhia a ni lova, lehlamah chuan chak thei zawk kan ni. Chance \ha vawi hnih thum vel khung loh kan nei a, anni in counter-attack a\angin an rawn khung ve ta zawk.” a ti a.
Benfica coach Nélson Veríssimo chuan, “Kan result ni lovin kan inkhelah ka lawm. 50-50 inkhel a ni a, chak tum ve ve kan ni a, a tir a\ang a tawp thlengin inkhel a \ang tluan zak.” tiin a sawi.