Rilru leh taksa lama rimtawngna avanga a kaihhnawihin mihringa nghawng a neih theihte hmachhawn leh sutkian dan chu clinical psychologist-te atangin Mizoram Journalists’ Association member te an zirtir.
MJA Gen. Hqrs. chuan MJA Golden Jubilee denchhenin nimin khan Aizawl Press Club-ah ‘Workshop on Stress & Stress Management’ an buatsaih a. Heti lama mi thiam bikte sawm an ni.
Inkhawm kaihruaitu, MJA President Zonunsanga Khiangte chuan Mizoram journalist-te chu hunin a khuahkhirh sa hnuaia hmanhmawh leh indaih lo reng renga kartluana hna thawk, ei leh in hun bi thlenga hun mumal nei lo an nih avangin stress nei awl zinga tel an ni a, chumi hmachhawn leh tihkian zel dan an hriat chu thil tul a ni tiin, workshop an huaihawt chhan a sawi.
He hun resource person Dr Lalremruati, clinical psychologist chuan, “Rimtawngna (stress) chu kan nitin nun hman dan te, kan thil tawn te, kan chhehvel boruak te a pangngai reng thei lo a; kan duh vang reng a ni emaw, ni lo emaw, danglamna a lo thleng thin a. Chung danglamna lo thlengte chu hmachhawn tumin kan rilru leh taksa nasa taka inralring chungin kan lo dawngsawng thin,” a ti.
Dr Lalremruati hian, “Ei hmuhna atan hna kan thawk nasa a. Kan hnathawhna boruak leh a chhehvelah harsatna neuh neuh thlen chang a tam thei a, journalist-ho zingah pawh hnathawhna boruak avanga rimtawng a awlsam phah thin a ni. Hna kan ngaih pawimawh laiin hahdamna lam kan ngai pawimawh ta lo thin a, hei vang hian rilru leh taksaah harsatna a lo thleng thin,” a ti.
Mi thiamte zirchianna in a tarlan danin, journalist zingah stress nei nia hrilh an nihin, an pawm lo viau a; amaherawhchu, stress lan chhuah dan ‘symptoms’ erawh nei an tam viau thung tih Dr C Lalremruati hian a sawi.
Resource person dang, Rebecca Lalnundiki, clinical psychologist chuan stress a thlena a talchhuah leh tih reh dan a sawi a. Thawk lak leh rilru sawrbingna hmanga rilru leh taksa sawizawi dan a taka a tihpui bawk. Heng hian thluaka harsatna awm thei a tih reh bakah thluak hnathawh a tih chak theih dan a sawifiah bawk.