Speaker chungchang avanga ni hnih chhung budget session-a an tel loh hnuah vawiin atangin ZPM legislature party member leh Congress legislature party member te chu budget session-ah an tel leh dawn.
ZPM rorelna sang, Political Affairs Committee (PAC) leh Congress party PAC-in an MLA-te lungawi lohna chungchang chu a hran ve ve-a ngaihtuahin, ZPM PAC chuan speaker-in dan lova thil a ti nia sawi awm chu Lokayukta lamah chhui chiang tura ngenna an thlen tawh avangin an MLA-te budget session-a tel chhunzawm leh chu an remti.
Congress party PAC pawhin, “Speaker-in dan lova thil a ti nia sawi chungchanga house leader-in speaker a hum tlat avangin rorelna dik a awm theih nan kan MLA-te budget session-ah tel chhunzawm se kan ti,” an ti bawk.
ZPM party chuan dan kalha hlawkna tela assembly speaker an puhna chu an umzui zel dawn tih sawiin, Lokayukta-in a chhui chian ngei pawh an beisei rualin, prosecution leh investigation staff-te thuam tha turin sorkar an ngen nghal tih an sawi.
Congress party pawhin Speaker Lalrinliana Sailo-in Khawzawl – Ngaizawl kawng siamna atanga Rs. nuai 100 a lo tel ve thu voice record a lo lang chu Mizoram politics tibawlhhlawhtu lian taka an ngaih thu an sawi a. Khawhai – Tlangpuilian kawng laihnaah pawh speaker hming a lang nia sawiin, Congress party-a a awm lai atang tawhin sum lama hmingchhiatna a ngah hle nia sawiin, MNF party pawhin thuchhuahte siamin, total bandh hial an buatsaih phah thu leh kum 2013 atang phei khan minister pawh a nih zui tak loh thu an sawi bawk.