K-pop Inpui ni mek BTS chuan Adele leh Taylor Swift nekchhuakin, IFPI Global Recording Artists Of The Year 2021 chawimawina an dawng.
Nimin piah khan International Federal of the Phonographic Industry (IFPI) hian twitter countdown atangin BTS chu winner an nih thu a puang a, heti hian kum-hnih zawnin BTS hi Global Recording Artist Of The Year an ni ta. 2020 khan he award hlu tak hi an kutah a tlulut.
Band khaipa RM chuan, “IFPI Global Recording Artist Of The Year award kan dawng thei hi chawimawina hlu tak a ni a, kumhnih zawna dawng thei hmasa ber kan ni phei hi chu malsawmna thuah hnih a ni takzet,” a ti.
IFPI tarlan danin, Global Recording Artist Of The Year atan tehna pawimawh tak tak hman a ni a, khawvelpuma digital leh physical music format-a an chet that dan te bakah streaming leh vinyl thlengin uluk taka enfiah vek a ni a, band/soloist te hmasawn dan leh hlawhtlinna hrang hrang buk tawn a nih hnu-ah he award ngaihhlut hlawh tak hi an pechhuak thin.
Hripui leng karah BTS tan larna leh sum a kiam thei lova, hun duhawm an hmang mek.