Indian Premier League (IPL) 2026 chu BCCI-in an ruahman hmasak aia ni hnihin a tlai dawn a, March 28 atangin an khel tan ang.
December 15, 2025 khan IPL chuan franchise-te hnenah IPL 2026 chu March 26-a tan turin an lo ruahman tawh a; mahse, IPL hian March 28-a tan tur leh final chu May 31-a khelh turin thutlukna an siam thar ta a ni.
IPL Governing Council chu tun hian inhmu khawmin inkhelh hun tur tlangzarh dan tur ruahmanna an tifel dawn niin hriat a ni a. Hei hi Assam, West Bengal leh Tamil Nadu-a inthlan hun tur puan a la nih loh avanga tihkhawtlai a ni.
Kolkata leh Chennai chu Kolkata Knight Riders (KKR) leh Chennai Super Kings (CSK) te hmunpui a nih laiin Assam khawpui, Guwahati chu Rajasthan Royals (RR) te khelmual pahnihna a ni.
Kum 2008-a IPL khelh tan a nih atang khan ram pum inthlan a awm kum – 2009, 2014, 2019 leh 2024-ah emaw, state inthlan a awm changin inkhelh hun tur hi tum hnihah thena tlangzarh thin a ni.
Governing Council chuan tun tumah hian chutiang ruahmanna chu an hmang dawn nge nia Election Commission of India-in heng state pathuma inthlan hun tur a puan phawt an nghak dawn tih an ngaihtuah rin a ni.
IPL Governing Council hian tournament hawnna inkhel hi khawia khelh tur nge tih an sawiho bawk rin a ni a, he inkhelah hian champion lai, Royal Challengers Bengaluru (RCB) an inlan dawn a ni.
Nikum June thlaa Bengaluru-a M Chinnaswamy Stadium-a RCB-in hnehna an chan lawmnaa buaina chhuak avanga entu 11 ngawt an thih hnu khan RCB leh Karnataka State Cricket Association chuan an team-in home match pasarih an khelh turte hi he stadium-ah hian an khel dawn nge hmun dangah an sawn dawn tih an sawiho mek a ni.
RCB hian khelmual dang an hman theih mai tur eng emaw zat an thlang chhuak a, chung zingah chuan Navi Mumbai, Raipur leh Pune te pawh an tel.