Arsenal in huntawp dawnah own goal avangin chakna goal ni tur an nei hlauh a. A sang pali an umna kawngah hnehna pawimawh changin 2-1 in Wolverhampton Wanderers an hneh.
Ningani zan Premier League inkhelah Wolves in Hwang Hee-chan goal khung chu an tan point thum
hmuh nan a tawk dawn a ang hman hle a. Mahse hun tawp dawnah Arsenal substitute Nicolas Pepe chuan Eddie Nketiah ball pass a\ang an si phurh a sut a. Gunners in na taka goal an bawh rah an seng.
Huntawp hma in chakna goal khung an tum hle a. Striker Alexandre Lacazette-a goal chance neih chu Wolves goalkeeper Jose Sa chuan an lamah a ti lut palh a. Emirates Stadium lawmin an au.
He result avang hian Mikel Arteta pawlte hi panganaah an inhlangkai a. Point khat chiahin Manchester United an pha lo mek a, khelh hnihin an khel tlem zawk thung.
Hetihlai hian Wolverhampton Wanderers pawh hi UEFA Champions League khelh phak beisei ngam an ni a, nimahsela an result avangin pasarihnaah an awm ve mek.
Bruno Lage pawlte hi Premier League match sarih chhunga a vawi rukna atana chak tum an ni a. Minute 10-naah South Korea international Hwang hmangin an dinhmun \ha hmasa mahsela an hlawhtling zo lo.
Arsenal manager Mikel Arteta chuan, “Vawiin hi eng ang taka pawimawh nge a nih dawn la hre lo mah ila kan match hmabaka hnehna kan chan zel hi chu a pawimawhzia kan hria. May thla a lo thlen hunah a sang pali zinga tel ngei tumin kan bei mek.” a ti.