- PL Liandinga
Mizoram that leh that loh innghahna chu kan ram hruaitute an ni. Tunhnai lawkah Singapore Prime Minister thusawi a darh hle mai a. Kan ramah tu lamtang nge tih a sawi theih lohva, Singapore Prime Minister hian Mizoram mitthlaa hmu chungin thu a sawi lova, an Parliament member thenkhatin thil dik lo leh dawt an sawi chungchang an khelna lama a thusawi a ni.
Singapore Prime Minister thusawi ber chu Parliament member te chu rinawmna leh dikna hmanga rorel tur an ni a, chutiang an nih loh chuan an ramin a tuar ngei dawn tih thu a ni ber a. Parliament member-ten thu dik lo sawi a, rinawm lo taka thil an ti kha a dik thei lova, a mawh an phur ngei tur a ni tih thu a sawina a ni. Keini chuan Parliament kan nei ve lova, Legislative Assembly kan nei a. Kan Legislative Assembly member, MLA kan tih te hi eng ang nge an nih tih hi kan ngaihtuah tur a ni.
Vanduaithlak tak maiin kan Chief Minister ber, Pu Zoramthanga chuan pawisa, cheng nuai 800 lai mai a lo kawl a, an han dap chhuah chuan, “Ka unaute pawisa ka kawl a ni,” a ti a. Mizoram mihring pangngai zingah he thu hi awih an awm chuan a mak hlein a rinawm a. A unaute hian an pawisa hi an kawltirna tur chhan kan hre lova, mihring kalphung pangngaiah puitling leh puitling, in hrang chang tawh hi pawisa inkawltir tur a ni ngai lovin kan hria a. Cheng nuai za chunglam thawk chhuak ve thei tawh patlingin unaute hnena pawisa kawltir ngawt hi thil awm thei lo a ni. Mahse a chhuitute chuan, “E, a nih tak chu,” an ti ta mai ni tur a nia. A unaute chuan khawi atanga an neih nge tih pawh an chhui tawh chuang lo ni chek tur a ni.
Thu awihawm lo deuh mai sawitu Chief Minister kan han nei phawt chu a nia. Hei chauh ni lo hian kan Chief Minister thusawi dik tawk lo emaw, a intiamna hlen leh si loh emaw, eng eng emaw hi kan Chief Minister chungchangah a awm fovin a lang a. A pawi ngawt mai. Kan Chief Minister apiang hi kan neih chhun an ni zel lo thei lova — pakhat a awm chhung chuan midang awm thiang hek lo. Mizoram hruaitu lu ber kan Chief Minister thusawi kan awih lo tlat a lang leh kan awih lo satliah pawh ni lova a dik lo ngei ni a kan hre tlat hi a pawi khawp mai. Hei hian kan vaiin min nghawng pha vek a, kan ram mipui rilru hi a phirsi phahin a ngheh loh phah tih loh rual a ni lo.
Kan Chief Minister bakah hian kan Minister te zingah kan rin tawk loh fe fe hi an awm nualin a lang. Thenkhat chu an sum leh pai neih a tam kan ti lutuk a, thenkhat chu khawiah emaw an pawisa khawn thawm leh pawisa thila an rinawm lohna thuthang kan hria a. Thenkhat chu an hnuai, an Department chan chhunga an sikul sak te a tha tawk lo lutuk a, thenkhat chu an hnuaia contract hmutu te an rinhlelhawm lutuk bawk a. Kawng hrang hrangin an chanvo chhungah rinhlelh tur kan hmu a.
Minister an nih hlim te, Chief Minister thutthleng an luah tirh tein kan ringhlel nghal ngawt lova, kan ngei nghal ngawt pawh a ni lo. Nihna an han chelh a, an thawm riva kan hre zauh zauh a. An tunhma nun te nen kan han chhuidawn a, chiang angreng tak taka thil sawi thei an awmin kan sorkar kalphung te pawhin duhthu a sam lovin kan hria a. Mipuiin kan rin zawh tawh meuh loh laiin anmahni hual veltu an mi leh sa te chuan anmahni fakna thu te an sawi lui tang tang a. Minister thenkhat pawhin Mizoram sorkar chu a intiamna apiang tihlawhtling zel angin an han sawi mai a.
Mipui hmuhah inngaihtlawm a, sual thupha chawi hun ni awm takah tihsual nei hauh lo anga inlantir a, mipui dawi at tum a, tha tak satliah pawh ni lo, tha em em anga inlantir an tum a. A chang chuan ngeiawm lamah te pawh a kal. Thenkhat lahin Pathian te hi an han lam thuai a, ‘Pathian zarah hetiang ka ti lo,’ han tih mai te hi kan insawi thiamna a ni fova. Mahse heng hi kan awih chuang lo.
Kan ram hruaitute hian mipui rin an hlawh tawh loh hnuah chuan insiamthat tum se a duhawm khawp a, mahse hetiang thilah chuan insiamthat hi a har viau mai. Insiamthat loh chu tihngaihna a awm tawh loh meuh chuan khua a lo tlai fe tawh tihna a ni. Insiamthat mamawh ang a an lan chuan buichhia laih lohvin an inpuang dawn tih ngaihdan neih a awl tawh tlat.
Kan buaina bul chu khawvel awm tirh ata mihring buaina tho kha a la ni. Duhamna leh Chapona thlarau sualin kan ram hruaitute hi a bawrh fova. Inngaihtlawmna nen rorel thin sela, pawisa sumah duham lo sela, ro dik rel hi a harsa lo. Mahse pawisa thilah kan duham tlat thin avangin kan rawngbawlna thutthleng chu thuneihna hman sualna thutthlengah kan chantir a. Mizo tlemte, rethei em em zingah kan vanneih tawhna chhiar lovin sum leh pai neih teuh kan duh ni te pawhin a lang.
Midang tana malsawmna tur ngaihtuah ta lova mahni inhaivur tum vanga sum leh paia duham taka awm te, inthlan leh a tlinna hmanrua a sum hman tum vanga duham ni awm taka awm te hian Mizoram hi a chawk buai a, kan ram hruaitute hian heng thil hi kalsan se a duhawm ngawt mai.