Education minister Lalchhandama Ralte chuan, NABARD sum puk hmanga sikul hrang hrang sak thar leh thawm that hnathawhah contractor ti tha lote chu bill pawh pe lo tura department hotute a hriattir thu house a hrilh.
Nimina assembly session neihah Congress Legislature Party Leader Zodintluanga Ralte zawhna kal zela member dangte zawh belhna chhangin Lalchhandama Ralte chuan NABARD loan hmanga sikul sak thar leh thawm that hnathawh chu a tha tlangpui tih sawiin, “Chutih karah chuan a thawk tha tawk lo tlem azawng erawh an lo awm ve bawk,” a ti.
Education minister chuan engineer-ten sikul 35 an tlawh tawhah 29 chu tha an tih hle thu an ziak tih sawiin, sikul paruk erawh a nih dan tur ang ni lo, siam that ngai, thlak ngaite a awm tih a sawi.
NABARD loan hmanga sikul sak thar leh thawm that hnathawh chu a nihna ang taka tha taka tih tur a nih thu leh hnathawhte pawh en uluk turin education department-a diretor, officer leh engineer te a hriattir tih a sawi a, “Hnathawktu ti tha lo, kuttlinglote chu bill pawh pek loh turin kan hrilh,” a ti.
Tuivawl bial chhunga hnathawh tha lo awm nia sawite pawh ti tha tura a hriattir nghal thu bialtu MLA chuan sawiin, a bial chhunga sikul thawm that hnathawktute pawh hna an thawh that loh chuan bill an dawn loh tur thu a hrilh tih a sawi.
Eptu party-ten NABARD sum puk hmanga hnathawh chungchang, press kaltlanga an sawite pawh an lo um zui ve char char tih minister chuan sawiin, “He thil chungchangah hian kan hnenah ziakin complaint in rawn ti lo chung pawhin kan theih chen chenah kan lo um zui a ni,” a ti.
Sikul sak that chungchang chu an bial chhung theuhah ruling leh eptu MLA-te chu enpuia lo vilpui turin a sawm tih a sawi bawk.
NABARD sum puk hmanga sikul hrang hrang sak thar leh thawm that hna thawh chungchanga zawhna leh chhanna hun hman lai hian house boruak a sang hle a, eptu member leh rorel lai MLA te inau buaiin, minister-in zawhna a chhan lai pawh hriat mumal hleih theih a ni lo.
Inhnial buaina a kal thui hmain speaker chuan member-te khapin, minister mic lo chu on tawh lo turin assembly secretariat-a thawkte thu a pe hial a ni.
Hemi chungchanga zawhna neitu chu Zodintluanga niin Congress MLA C Ngunlianchunga leh MNF member Lalrinsanga Ralte ten an zawt belh a, minister-in zawhna a chhan lai hian ZPM Legislature Party Leader Lalduhoma leh Dy Leader Vanlalhlana ten an ngaihdan leh minister thu sawi an lo zawh belh a ni.