NUIH A ZA LO THIN NGAWT MAI

  • Ramherliana, Mi naran

Chanchinbu headline-a Sorkar hnathawkte’n an thlabi hlawh an lak theih thute kan chhiar a lawmawm kan ti ta em em te hi a lungchhiatthlak zawk ngawt mai. Hri lengin kan engkim min tibuai a, sorkar kalphung engkim pawh a tibuai emaw kan tih lai mekin khawi lai hmunah emawte chuan hna thawh mek alo ni lawi a. An hnathawh leh an dinchhante ramin kan thatpuina pawh kan hriat chian chiah lem loh Board 14 te tan pawh thlatinin cheng Nuai 12 vel emaw lai sen ral zel a ni bawk awm a. Tunah pawh SEDP sem tum ngei a nih thu kan han hre zel bawk a, nimahsela ‘Nuaih thum in dawng ang, NLUP dawng tawh zawng zawng pawhin in dawng vek ang’ tia Pu berin a sawi lai video clip kan kawl ang hi chu a ni chiah dawn lo nge ni hei Sing li/ nga tihte sawi alo ni leh ta zawk a! Kum 10 chhung kha inzirna atan kan hmang a, tunah chuan kan thiam tawh ngawt ang tia 2018 April thla vela thusawi kha chu a ni chiah lo nge ni hei tunah pawh duhkhawp lohna hawi zawnga thusawi hriat tur a tam malh malh thin hle mai.

Hri lengin min chimbuai ngei mai a, sorkar hruaitu ber atanga mimal chhungkaw tin thlengin kan nunphung a buai avangin tumahin sorkar hruaituteah hun dang angin beisei kan nei sang ngam lo a, hmasawnna hna pawh thawk tluang thei lo kan ni. Nimahsela chutih lai reng chuan hmun thenkhatah chawl loa hnathawh a niin tul mang lo thlenga thawh a han ni ta zel bawk hi a chhan hriat ve kil kel lem loh chuan thin a ti rim zawk mah a. Mipui tana tha tur leh tul ngawih ngawih a nih erawh chuan kan la hrethiam thei zel nain mipui tana hnemhnanna pawh kan hriatloh thil tam takah mipui sum leh pai heti zat a luang ral ta thin hi a mak mange tih mai loh chu sawi tur a vang a nih tak ber hi maw. Khawi lai hmunah emaw chuan sum hi a luanin a luang a ni ber mai awm a, a tling hmasa Lalngovin a thal zo zel tih ang mai a niin Lalngovi hi kan hnam tana chhawr nahawm tak pawh alo ni ang e.

Kan Political Party te lah chuan mipui tana hmahruaitu nih an tum tak tak lo emaw tih mai turin Opposition lamte ngei pawh beisei lai takin an reh thuap a, beisei loh lamah thawm an rawn nei leh ang lawi bawk a. Zirlai pawl (MSU) te chuan June 27, 2018 daih tawha Tribal Certificate lo nei tawh Kamrula oh! Kamlova Chhangte chu Nov. 23, 2021 ah chuan Aizawl DC hnenah Cancel sak turin hma an lo la daih tawh a, anni ang bawkin CYMA pawh chuan Feb. 11, 2022 zanah an thutkhawmin Kamlova Chhangte hnena Tribal Certificate pek tawh chu tihtawp thuai a nih theih nan chak taka hmalak an lo rel ve bawk a. Hetih lai hian kan Politiciante lah chuan ngawi an lo dawh mek zawk nge ni an thawm hriat tur reng reng a awm lo a, vawiin thlengin a reh tlawk tlawk mai a ni awm e. Feb. 18, 2022 alo thlen meuh chuan MSU lamin Kamlova Chhangte hi hmuh ngei tuma an zawn thu kan han hre chhunzawm zel bawk a. Chutih laiin tuin emaw ni Delhi-a kan CM te zanriah kil chungchang a ziah chu Party meuhin thuchhuah siamin dawt a nih thu an rawn tarlang a.

A thenah FIR thehluh kan rang viau thin bawkin ngawih liam mai mai tur emaw tihah pawh patling a pumpa buai em em mai thin hi kan ram hruaitute zingah kan han awm tlat mai bawk a ni awm a. Insawifiahna tha tak chhuah hi mipui hnehna a ni lo tih hi an hre awm tho si a, ngawi ve mai mai sela nakin lawkah a dikna leh dik lohna chu ala rawn hriat tho dawn avangin han nghak hlek zawk sela tha mai thin tur. A hrim hrimin ram hruaitute hi keimahni ang bawka thil tisual palh ve thei an nihna hi tumahin kan hai lo a, tun hnai lawka UK Prime Minister in a ram mipuite hnena ngaihdam a dil ang te khan ngaihdam dil hi hreh lo sela mipuite pawh hian kan ngaihdam mai tur nia alan laiin keini chuan thuneihna hmanga hmehmih kan tum zawk emaw ni tih tur hi a ni si a, a hahthlak thin ngawt mai.

Hei lo hi ram dang nei ni ila hei lo hi kan tu leh fate chenna tur hi awm nisela chuan heti taka ram kan sawisa hi chu a ngaihthiam deuh theih tur hi a nih laiin hei lo chu ram dang kan nei lo a, hei lo chu kan tu leh fate chenna tur atan pawh ram dang a awm si lo. Keimahni ngei pawh hian hei lo chu ram dang kan nei lo a, hei lo chu ram dang hi kan nei hlawl lo a ni. Nimahsela mi rama cheng ang mai hian he ram tan erawh ngilneihna leh hmangaihna lantir kan tum ngai lo a, a theihna hmun hmunah, a theihna mual mualah he ram hi kan sawisa tlang a nih tak ber hi maw. A pawizia leh a nghawng nat zia hi tuna mite hian kan la hre chho ngei bawk turah ngai ila, kan inchhirna hi ban a chen ngei ang le. Chutih hunah chuan ‘a pawi a ni’ tih hian a sawifiah phak kherin a rinawm loh a, a pawi dawn lutuk ringawt.

Chhia leh tha pawh thliar hrang thiam lo a ngaih kan fate ngei pawh hi pi leh pute hun atanga zo nun zemawi chhawm nung zel tur hian kan zirtir tam tawk bawk si loh avangin khawthlang lam mi tute emaw zia an la rawn thanlenpui lo ang tih pawh hi sawi har tak tur a ni a, tuna keimahni leh keimahni kan inseh mekna karah hian kan chhehvela hnam dangte tih angte hi an lo zawmin sakhaw dangte pawh hi an lo vuan reng tawh zawk mai lo ang tih pawh sawi har tak a ni. Chu mai bakah chuan kuttling loa sum leh pai lakluhna kawng hi keini aiin an la rawn hre daih zawk ang a, dan loa thiltih tam takte hi dan ve reng emaw an la rawn ti ngei ang tihte pawh hi hlauhawm tak bawk a ni. Hetiang neuh neuh ngaihtuah hi chuan kan vawiin hun hman dan hian nuih a ti za lo a, kan sorkar kalphung leh mipui nunzia reng rengahte hian kan naktuk hun tur hi a thim tlata hriatna a len zawk bawk si avangin kawchhungah eng emaw mawlhtu lian tak nei ang mai hian min awm tir ul reng a, nuih luih tum mah ila nuih a za mawlh si lo a nih si hi.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427