Home Minister Lalchamliana’n Assam leh Mizoram ramria Aitlang leh Buarchep rama Mizo huante chu lak let tumna a awm thu house a hrilh.
Budget session neih meka Aizawl South II bialtu MLA Lalchhuanthanga zawhna ziaka a chhan danin, Aitlang leh Buarchep rama Mizo huante hi lak let tumna a awm a. Huan leh leilette hi Mizoram leh Assam-in ram neitu nih an inchuhna hmuna a nih thu leh, huan neitute buaina leh harsatna tawh pawh Mizoram leh Assam state ramri pawm dan inang loin a nghawng/hrin chhuah a ni a. Buaina ching fel tur chuan state pahnihte ramria buaina hi tihfel phawt a ngai dawn niin a sawi.
Home minister hian Aitlang leh Buarchep-a Mizo ram leh huan thlai chân mekte harsatna tawh sukiang turin Mizoram sorkarin a theih ang anga hma a lak mek zel thu Aizawl South I bialtu MLA C Lalsawivunga ziaka zawhna a chhang bawk.
February 3, 3022-a home minister, Mizoram leh minister, Norder protection & Development, Assam-in video conference meeting-ah Aitlanga hmunphiah leh thlai dang chingtute harsatna hi sawi a nih thu a sawi a. State pahnih minister-te hian harsatna leh buaina awm loin huan thlaite hi seng a nih theih nan Kolasib leh Hailakandi DC-ten ruahmanna siam se tia thutlukna an siam bawhzuiin, DC pahnihte hian February 4, 2022 khan Bairabi-ah inbiain, chumi avang chuan hmunphiah leh thlai dang neitute hian harsatna awm loin an seng thei vek tih a sawi.
Aitlang leh Buarchep-a Mizo huan leh ram chhungah Assam police-ten an la luah chhunzawm zel a. A bul hnaiah Mizoram police camp thahnem tak dah niin, inkalpawhna kawngte laih a nih bakah electric leh tui in tur pekna a theih chin chinah an siam zel thu home minister hian a sawi bawk.