Home Minister Lalchamliana chuan district magistrate-ten sorkar khap thil an man thei a, a hmuna tihchhiat theih nghalna an nei lo tih sawiin, kuhva rah tawlh ruk chungchangah police lal inrawlh an awm an hriat loh thu house a hrilh.
Nimina assembly session neihah Congress member C Ngunlianchunga zawhna leh member dangte zawh belhna chhangin home minister chuan district magistrate-ten police leh excise ang bawkin sorkar khap thil chu an man thei a; mahse, anmahni thuin tihchhiat theih nghalna an nei lo tih a sawi a, “Dan kalphung pangngaiin an man anga thubuai siamin court-in a ngaihtuah ang a, court-in tih dan tur a hrilh angin an ti chauh tur a ni,” a ti.
Kuhva rah tawlh ruk chungchangah police lal inrawlh tih hriat an nei lo tih sawiin, “Social media thenkhatah chuan a lo lang a nih pawhin chiang taka report emaw, chiang taka sawi emaw a awm lo,” tiin a sawi.
Lalchamliana chuan Champhai Bawrhsap Maria CT Zuali’n dan loa kuhva rah tawlh a man avanga a laka FIR thehluh chungchangah a hriat chinah sorkarin chhan tum emaw, tum lohna emaw a nei lo tih sawiin, “Hemi chungchanga report lo lut chu law department-ah exam turin a kal mek niin ka hria,” a ti.
Sorkarin smuggling tih a phal em tih zawhna chu chhang bawkin, smuggling hi sorkarin a phal lo a, tu sorkar mahin an phal lo tih a sawi a, dan loa kuhva rah tawlh an mante chu a theih chin chinah chawitir emaw, eng emaw tia hrem a nih thin thu a sawi tel bawk.
Home minister chuan, “Kuhva rah tawlh hi central atangin ‘lo dang rawh u’ an ti a, hetihlai hian ‘Mizoten an hlawkpui ve alawm’ tiin kan mit an lo siai tawh,” a ti a, hemi chungchang hi nikuma session-ah pawh a sawi chhuah tawh thu a sawi.
Tunah erawh kuhva raha sumdawnna chu a serious zia an hriat tawh thu leh a that lohzia te an hre telh telh tiin, “‘I khap ang u,’ kan ti a, DC hnenah tum hnih lai khap turin hma kan la,” a ti.
Social Activist Vanramchhuangi’n Champhai Police Station-a FIR a thehluh chungchang zawhna chhangin home minister chuan Vanramchhuangi FIR thehluh chungchangah police-ten Judiciary lam an rawn mek nia a hriat thu a sawi.
FIR register chungchang sawifiah bawkin, miin FIR a theh luh chu cognizable a nih chuan register ngei ngei tur a nih thu sawiin, mahse thil thenkhat ah erawh supreme court order register nghal lo a, enquiry tih phawt ngai a awm thu a sawi bawk a ni.