Power & Electricity (P&E) department chu corporate-a let turin hmalak a ni a, functional unit pathuma then tuma hmalak mek a ni.
P&E hi Functional Unit pathum – Transmission, Generation leh Distribution Stategic Business Unit-ah then tuma hmalak mek a nih thu hi Minister R Lalzirliana’n assembly session-a zawhna ziaka chhangin a tar lang.
He department changtu minister-in a tar lan zel danin, Administrative Staff College of India (ASCI)-in Final Report on Reforms & Restructuring of Mizoram power sector a siam a, rawtna zirchiang turin Mizoram sorkarin task group a din tawh.
R Lalzirliana chuan task group-te hian hma an lak mek thu sawiin, “Tunah hian department-a study team-ten an zirchianna leh ruahmanna siam an peih fel tep a ni,” a ti.
Corporate-a P&E department leh chungchang hi Independent MLA C Lalsawivunga zawhna a ni a. Power transmission loss nasa lutuk chungchang te, Hydro Electric Power chungchang leh Power hman man tih san chungchangte minister hi a zawt bawk.
R Lalzirliana chuan eptu member zawhna ziaka a chhan zelnaah Mizoram chhunga power transmission loss nasa lutuk tihhniam nan hmalakna a awm thu sawiin, hemi atana sum ruahman chu Rs nuai 29,074 a nih thu leh transmission loss tihhniam nan 2020-21-ah Rs nuai 1,055.56 sen ral a nih thu a sawi.
Kawlphetha megawatt 50 chung lam siam chhuak turin sorkarin hmalak an tum dante sawi bawkin, megawatt 76 siam chhuahna tur Mat-Sekawi HEP ruahman a nih thu sawiin, “Tunah hian he project Survey & Investogation (S&I) tih belh ngai la awm leh DPR siam puitling tura WAPCOS Ltd ten an siam theihna rate an rawh thehluh chu sorkarah theh luh niin, bawhzui mek a ni,” a ti.
Kum 2021 chhungin kawlphetha hman man chu tum khat tihsan a nih thu sawiin, kum 2021 chhungin kawlphetha hman man tlingkhawm chu Rs nuai 24,679.42 a nih thu zawhna a chhannaah hian a tar lang bawk.