- Lallunghnema, Charity Lodge
Kan inbih chian a hun tawh!
Kumtinin Financial Year intanna thla April atanga hman turin Joint Electricity Regulation Commission for Manipur & Mizoram chuan Mizoram Electric Tariff a tichhuak thin a. Mipui lam atanga sawiselna emaw rawtna emaw thlen duhte leh siam that duhte tan,’petition’ theh luh theih Hun a hawng thin a. Pawl leh mimalin ziakin awmze nei takin thlen theih a ni. Kumin atan chuan Petition theh luh hun chhung ruat chu January ni 20 a ni. Hun tawp hi Pathianni a ni a, ni 21 thleng ni ta zawk se, awmzia a nei zawk ngei turah ka ngai. Mahse,tun tumah hian pawl hrang hrang 6 velin petition an theh lut a.
Nikumah khan Electric Tariff thar chungchangah hian JERC hnena Petition theh lut an awm meuh lova. Petition thehlut tura beisei eng pawl mahin an theh lo tluk a ni. A theh lut awm chhun ZPM lah chuan Public Hearingah an Pawl aiawha an tirh ber chu a lo kal tlai hle a. Public Hearing thulh mai a hlauhawm hial a ni. Hotute duhsaknain kei chu State Advisory Committee a member ka nih angin Public Hearing neihnaah khan la tel tluan chhuak a. Pu Vanlalruata, CYMA President kal chhuak ta nen khan kan thu dun a, sawi tur kan ngah ve ve hle a ni. Kuminah pawh hian Public Hearing neih hma hian State Advisory Committee Meeting neih tur a ni a. Hetah hian Mizorama Kawlphetha hman chungchang tihhmasawn dan tur chi hrang hrang ngaihtuah a ni ang. A ni hnihna Public Hearing-ah hian SAC Memberte pawh tel ve nghal tura ngaih kan ni. SAC Meeting hi meeting pawimawh tak, Mizoram hnuk khawih, kan rinrawl ber zinga mi Power & Electricity tihhmasawnna tur kawng hrang hrang sawiho a nih avangin Memberte pawh thahnemngai taka tel ve ngei ngei chi a ni. NGO aiawh heng MUP, MHIP leh YMA te pawh hi an intah hriam hle a ngai dawn a ni. Heng NGO aiawh hian an President theuhte chu State Advisory Committee member an ni nghe nghe. Public Hearing ah hian sawi duh nei apiangin an ngaih pawimawhte sawi theihna hun hawn a ni a. He Hearing ah thu sawi tumte chu inbuatsaih nasat hle a ngai ang.Inbuatsaihna tha awm loh chuan din ve ngawt na chi niin a lang lo. Sawihonaa ding an tam poh leh JERC an lawm ang tih a rinawm a ni.
Kan hriat angin kumtin Kawlphetha chhit man hi Financial Year bul tanna thla April atangin tariff thar hman tan thin a ni a. P&E Department mi thiamten an ngun taka chhutin rawtna an siam thin a. Chu rawtna chu JERC hian a lo pawmpui a. Mipui hman turin a tlangzarh ta thin a ni. Hetiang Kawlphetha chhit man bituknaah hian eng Ministry mah hi a inrawlh lova. Official-ho hnung an hiahsak lo a ni. Mahse, hetih laia thil lang chiang tak chu Mizoram Sawrkar hi Kawlphethaah hian a intodelh lo fahran lutuk a, sum indaih lohna chu State Sawrkar chuan a tumsak ta thin a. Vaibelche eng zat pawh ni se, State Sawrkarin a tum (meet) thin a ni. Mahse, nikum khan kan Sawrkar hian Kawlphetha a sum indaih lohna a tum( meet) theih chin a bithliah tak avangin tariff punna pawh a sang lo thei ta lo a ni. Heta lang chiang em em chu Sawrkar sum nei lo, indaih lo hi mipuiin kan tawrhphah tih hi a ni.
India ram State thenkhata April 2021- March 2022 chhunga electric man rate (minimum) chu hetiang hi a ni.
State hming — Rate(tariff) minimum
- Maharashtra. —–. Rs 9.76 per unit
2.Madhya Pradesh —– Rs 8.73. ™
3.West Bengal(urban) — Rs 8.44 “
4.West Bengal(rural). — Rs 8.31 “
5.Mumbai. ,–Rs 8.69 “
6.Bihar. –Rs 7.71. “
7.Tripura. –Rs 7.55 “
8.Assam. –Rs 5.14. “
9.Andra Pradesh. — Rs 4.71. “
10.Mizoram. –Rs 4.48. “
11.Karnataka. –Rs 4.38. “
12.Uttar Pradesh. –Rs 4 45. “
13.Jharkhand. –Rs 4.11. “ - Punjab&Nagaland. — Rs. 4.11. “
Heta kan tarlan bak State dang Tariff chu kan tarlang lo mai ang. Han thlir vang vang la, Mizoram Tariff hi a sang ber pawl a ni lova, a lai hawl a ni. Power thar chhuahah hian a hniam ber pawl kan ni a. State Sawrkar hian power indaihlohnaah P&E chu kan Sawrkar hian a tumsak (meet) thin a ni tih kan sawi tawh. Tunah hian kum thar 1st April.2022 –31.March.2023 chhunga tariff hman tur chu chhawp chhuah a lo ni ve leh ta a. Mipui atangin sawiselna pawh a ring hle a ni. Kan hriat thiam theih danin hetiang hian han sawi ila. Tuna rate kan hman man hi Domestic -ah unit 1 atanga unit 100 Rs 4.80 a ni a. Rate tharah chuan Rs5.10 a ni thung. A punna hi unitah paise 30 a ni. Tin, Unit 100 leh 200 inkar hi tuna kan hman mekah hian unit-ah Rs 5.50 a nih laiin Rs 7.50 a san tum a ni thung a. A punna hi Rs 2/- a ni ang. Unit 200 Chung lam zawng Unitah Rs 5.90 a nih laiin Rs 9.50in a pung thung dawn a. A punna chu Rs 3.60 a ni ang.
Heta tanga lo lang chu unit a tamin power hman rate a sang zel tihna a ni.Welfare State kan nih angin Sawrkar policy reng reng hi mirethei lam hawia duan chhuah a ni zel a. Power hman man pawh hi mirethei fairel tin zawna chhawp chhuah zel niin a lang. Tuna ruahmanna tharah hian Unit slab hniam ber punna hi paise 30 a ni. A sang kan ti a nih chuan thu hran ni se, kei chuan a sang hran ka ti lem lo. Power thar chhuak tam zawk leh state changkang zawkte tariff kan tarlan hi kan thlir hian an sang em em a ni. Engpawhni se, tunah hian Mizoram Sawrkar hian sum eng zat nge a theh chhuah dawn tih hi kan ngaihchan chu a ni. Pawisa nei tak Sawrkar kan nih loh avangin Sawrkarin power atana senso a tum zat tur atanga hisapa tariff siam a ngaih thin avangin JERC leh P&E tan pawh a luhai thlak viau mai thei. Eng pawh ni se, kan hriat tlan angin Kawlphethaah hian kan indaih lo hle a, ram pawn hmun hrang hrang atanga sum tam tak senga chawk luh a ni a. Mipui hian eng emaw zat chu kan tum ve a ngai hrim hrim niin a lang. Thil man sang zelah Kawlphetha chhit man hi sang ve tura ngaih a ni hrim hrim bawk. Mahse, mipui phur tirit zawnga tihsan vak hi erawh chu a welfare state zia lo ni mai. P&E lama tariff buaipuitute pawh hian an ti mai maiin a rinawm lova, JERC pawh hian mipui dinhmun thlir chung zelin tariff bituk chungchangah thutlukna a siam ngei turah ngai ila,a tha awm e.
Ka sawi duh ber chu mipui hian Kawlphetha leh bill chinchangte hi kan zir chian a tul tawh hle tih hi a ni. Bill a sanin kan phun a, thil hriata zir erawh kan tum der si lo laite hi a buaithlak lai tak chu a ni. Sawisel leh phun nachang kan hria ang hian kan inzir peih ve em? Kawlphetha min petute hi fak kan va hreh em! te hi ka ti fo thin. Eng nei lova minute khat tak ngial pawh hrehawm kan tih thinziate hi hi kan chhut ngai em aw, ka ti thin hial a ni.
Tun tuma ka sawi tum ber chu hengte hi a ni. - Power Tariff chungchanga kan inchirh theh nasa thin lutuk thin hi bansan a va tha em!
- Politician-te leh kan mithiam chhuanvawrte hian hian heng Service Provider-Power, Water Supplies (PHE), LPGas , Public Distribution System etc Mannual, Rules, Regulationte hi kan ngaihsak a va hun tawh em!
- Tui leh Kawlphethate hi renchem a va tul em!
- Sawrkar pachhe tak hrawn chunga hnianghnar kan tum tlatte hi ngaihdan atthlak tak a ni.
- P&E hian staff an ngah lutuk mipuiin an tih laia anniin, ‘kan indaih lo,’ an la ti a nih chuan inher rem a tul hle tawh a ni ngei ang.
- Staff zinga hna thawk lova, thu mai mai an awm thin reng em? tihte hi kan inzawt thin a ni.
Eng pawh nise, mipui leh pawlho hian keimahni zawnah theuh Power-a kan lo intodelh ve theih nan tih tur ka nei ve a ni. Tin, Sawrkar fin chhuaha thawhpui thiam a pawimawh hle a ni. A inep zawnga politicised chiam chiam hian sawtna leh tangkaina eng mah a thlen lova. Rah tha a chhuah tlem hle a ni. State changkang leh hmasawn zawkahte pawh hian Kawlphetha chhit man hi a sang ve em em a. A pawnga puiin a thlawnin an dawng lo niin a lang. State thenkhatah eng chhit man a hniam hle, tih kan hriat rualin Mizoram ang tluka Power indaih lohna leh hnianghnar lohna state hi a tam lo khawp mai. A pawimawh ber chu ram hmangaihna tak tak nei lo hovin politics an khelh hian kan tuar a. Mahni chhungte leh mahni party chauh hmangaihtu ho an rawn inlar hian mipuiin thutak kan hre thei tawh thin lova. Buaina hlirin kan nun a tuam a ni. Hei hi a pawi em em a ni.