Thangrama Mizo awmten an unau thisen zawmpuite nena Mizoram chhunga rorelna khat hnuaia awm leh an duh ber thu an sawi a. “Mizote inpui, Zofate Jerusalem hi belh tlakah kan ngai a, kan hmalak zel dan turah Mizo mipuite kutah kan innghat tawp mai a ni,” an ti.
Nimin khan Thangram Indegenous People’s Movement (TIPM) chuan Aizawl Press Club-ah thu thar thehdarhtute an kawm a. TIPM hruaitute chuan Thangram chhunga chengte hi Mizo hnahthlak heng – Hrangkhol, Chorei, Ranglong, Molsom, Kaipeng leh Sakachep te an nih thu leh British lo luh hma daih tawha lo awm tawh an nih thu sawiin, “Pi pute huna rorelna pakhat hnuaia awm thin chu rorelna fello avangin then hranin kan awm a,” tiin, an duh ber chu Thangrama Mizo awmte hian an unau thisen zawmpuite nena Mizoram chhung rorelna khat hnuaia awm leh a nih thu an sawi.
TIPM hruaitute chuan Mizoram chhung rorelna khat hnuaia an awm leh theih nan December, 2020 khan prime minister, union home minister leh union home secretary te hnenah memorandum ‘Prayer for Merging of Thangram Under Mizoram State’ an lo thlen tawh thu leh, kawng zawh leh awareness campaign bakah sorkar hruaitute an dawr chhunzawm reng tih an sawi bawk.
“He movement a hlawhtlin ngei theih nan hian Mizorama kan unaute hian kawng engkimah min thlawp a, min tawiawm a, tanpui kan ngaihna apiangah min tanpui turin All NGO, political party, kohhran, sorkar leh mi mal te kan ngen che u,” TIPM hruaitute’n an ti.
Zawhna chhangin TIPM hruaitute chuan India sorkar hnena memorundum an thehluh chu tun thlengin chhanna an la hmuh loh thu an sawi a. Chutih laiin, a theih ang anga hma lak chhunzawm zel an tum thu sawiin, “Mizote awmna ram hi humhim turin theihtawp kan chhuah zel dawn a. Mizo mipuite nena kan tan ho chuan kan hum thei a ni tih hi kan ring tlat a ni,” an ti a, tunah hian chim ral mai theih dinhmuna an din tan thu an sawi.
“He movement a din hnuah hmasawnna hnathawh te sorkar lamin rawn tum mah se, keini hian development hi kan tihchhan a ni lo a. Sorkar hotute nena kan indawrnaah pawh development hi kan mamawh ber a nih loh thu hi kan chhanna a la ni reng. Kan unaute nena ram khata awm hi kan duh ber a ni,” tiin zawhna an chhang.
TIPM hruaitute sawi danin, Thangram hi Mamit district chhung Kanhmun (Langkaih Valley) leh Thinghlun (Singla Valley) hrula awm niin, square miles 180-a zau a ni a. North eastern Area (Reorganisation) Act 1971, 1st Edition 1974 Survey of India in a report-ah Toposheet number 83D7 hi la tihchian loh a ni.
Tun dinhmunah hian Mizo khua hi Singla Valley (Dullabcherra RD Block)-ah hian 10 awm mekin, Langkai Valley/Longai Valley (Lowairpoa RD Block)-ah khua 14 a awm thung.