Sinlung Hills council (SHC)-a sorkar dinglai paihthlak tuma hmalakna awm an duh lohzia lantir nan Hmar People’s Convention (HPC) party-in March 1 atangin Sakawrdaiah total bandh neih an tum.
February 26, 2022 (Inrinni)-a HPC Party General headquarters office bearer thukhawm chuan SHC sorkar tluang taka a kal laia HPC leh MNF inremna zah loa sorkar paih tuma hmalakna leh SHC zahawmna humhimna atan Sakawrdai area-ah March 1, 2022 atangin tiam chin awm lovin total bandh neih an rel a, a tul dan ang zelin SHC area pum puiah pawh total bandh hi puan chhunzawm zel an rel bawk.
Hemi chungchangah hian HPC Party chuan thuchhuah siamin, SHC General election hmasa ber atana HPC Party leh MNF ten thawhdunna an ziah kha a zahawma, tih chhiat an duh lo tih an sawi a. Hetihlaia MNF member pathum leh independent member pathumin chhan mumal awm lo taka sorkar paih thlak tumna motion an pu lut chu an dem tih an sawi.
SHC-a sorkar ding lai nam thluk tumtute hian sorkar siam tumin an vir kual mek tih sawiin, an thiltih hi titawp vat turin sorkar an ngen.
HPC party chuan member parukin sorkar an rintawk lohna an thehluh ngaihtuah tura February 18, 2022-a chawpchilh taka session koh kha HPC member-te hian official notification an dawng lo tih sawiin, an tel loa nawrluih session kha HPC party chuan an pawm lo hul hual tih an sawi.
Sakawrdaia total bandh neih an tum chhan hi sorkar dona ni loin, hnam phatsantute thil tih duh lohna leh SHC tluang taka a kal theihna tura tih a ni tih an thuchhuahah chuan an sawi a. Political party sawi loa he hmalakna hi thlawp vek tura ngenin, bank dawr fel tur leh chakkhai te inlam fel turin mipui an ngen nghal bawk.
Tar lan tawh angin, SHC-a MNF member pathum leh independent member pathumten February 16, 2022 khan Counsil sorkar rintawk lohna, no confidence motion chu SHC chairman hnenah an thehlut a. February 18, 2022 khan SHC special session koh niin, deputy chairman kaihhruaina hnuaiah member parukte chuan sorkar lai chu an phar thla a ni.