Tripura-a thuneitute chuan Inrinni zan atang khan an khawpui, Agartala hmun thenkhatah pun khawm khapna, CrPC (Criminal Procedure Code) Section 144 an puang.
Inrinni zan khan rorel lai, BJP leh Congress mite chu hun hmanna hmun pakhat, Chief Minister Biplab Kumar Deb-a bial, Banamalipur-ah nasa takin an intibuai a ni.
BJP pisa pakhat chu tihchhiat nual a ni a. BJP minister thin, tun hnaia Congress zawm ta, Sudip Roy Barman chuan hliam tenau a tuar bawk a, a bak chu party pahnih hian hliam tuar an sawi lo.
Police hotu pakhat chuan, “Buaina a chhuah chhan leh a mawhphurtu kan chhui tan mek a. Khawi atang mahin complaint kan la dawng lo va, buaina dang chhuak tur vengin zankhuain venhim hna thawktu kan dah a. Tu pawh he buainaa inrawlh lakah hian hremna kan pe ang,” a ti.
Buaina a chhuah hnuah hian state thuneitute chuan Agartala hmun thenkhatah khuahkhirhna a puang zui a, heng hmunah hian mi panga aia tam awm khawm phal a ni lo.
Inkhuahkhirhna hi zan dar 10:30 atanga Pathianni zing dar 5:00 thleng kha niin thil duhawm lo dang a thleng zui lo.
BJP thupuangtu, Nabendu Bhattacharya chuan, “Kan mandal office chu beih a ni a, kan mite eng emaw zat damdawi inah hruai ngai khawpin an awm a. Engzat chiah nge kan mite zinga hliam tuar awm kan la hre mai thei lo va, buaina hi Congress party chhunga buaina awm avanga chhuak a ni a, he inbeihna thlengah hian anni chuan min puh ve thung a; mahse, min puhna hi engmah tanchhan tha nei lo a ni,” a ti.
Roy Barman chuan buaina chhuakah hian police-in engmah tih an tum lo niin a sawi ve bawk a. Rorel lai party chuan police pawh thununin an state-ah dan leh thupek kenkawh a chhe hle tih a sawi bawk.
Political party pahnih hian zan rei hnuah he thil thleng duh lohna hi a hran ve vein an nei zui leh a. Buaina chhuaka a mawhphurtu chu hrem ngei an phut tih an sawi ve ve bawk.