UD&PA changtu, Deputy Chief Minister Tawnluia chuan smart city guideline-ah infiamna ruhrel siamte tel lo mah se Mizo thalaite tana thil pawimawh a nih avangin committee-in her remin sports atan smart city sum hman a nih thu a sawi.
Nimina assembly session neiha zawhna leh chhanna hunah Independent MLA Dr Vanlalthlana chuan smart city guideline-in pawimawh a tih leh a ken tel chu zirna te, hriselna leh thil dangte a nih thu sawiin, hetihlai hian smart city sum chu guideline kalin infiamna ruhrel siamna atan hman a nih thu a sawi a, engvanga guideline kalha kalpui ta nge an nih tih UD&PA changtu minister a zawt.
Tawnluia chuan Dr Vanlalthlana zawhna chhangin smart city sum an hman dan a sawifiah a, smart city sum hman dan chu committee-in a her rem thei tih sawiin, “Tuna programe kan kalpui dan hi hmunpui lamin an pawm,” a ti.
Smart city guideline-in pawimawh a tih zirna hriselna leh thil dangte chu an ngai pawimawh viau tih sawiin, chuti chungin Mizo thalaite tana pawimawh infiamna ruhrel din leh mipui vantlangin an chhawr tur hmunpui pawimawh atan smart city sum hmang tura ruahmanna an siam chhoh thu a sawi.
Deputy chief minister chuan Aizawla bazarpui sak thatna tur, ‘Modernisation of Bara Bazar’ DPR chu approve tawh a ni tih sawiin, “Tender tura buatsaih mek niin, a rang thei ang bera sak tan tura hmalak a ni,” a ti.
Hemi chungchang hi zawtna zawttu, Dr Vanlalthlana chuan sawi belhin, chhungkaw 1,093-in eizawn nan an hman, New Market building thiah tak chu a hmunah a va kal thute, New Market office lamin January thlaah tender chhuah theih an beisei thu an sawi laia tun thlenga la tihchhuah a ni lo chu a hriatthiam loh thu sawi.
UD&PA minister chuan Aizawla lirthei dahna sakna tura scheme siam, Parking House Support Scheme (PAHOSS) chu kalpui mek a ni a, mi 11-in an sa zo tawh a, tangkai taka an hman mek thu a sawi tel bawkin, tunah hian mi eng emaw zatin parking house sak hna an kalpui mek tih a sawi.
Zawhna zawttu, Dr Vanlalthlana’n PAHOSS scheme hnuaia tanpuina dawng zingah parking atan hmang lo an awm nia a sawi chungchang chu chhang bawkin, Tawnluia chuan parking nana hmang lo an awm an hriat loh thute, chutianga a nihna tura hmang lo an awm chuan hrilh hre tur leh an lo chhui chhuah tur thu a sawi bawk a ni.