Taiwan-a an khawpui lian tak tak, khawpui ber, Taipei pawh telin, power plant-a accident thleng palh avangin power nei lovin an awm.
Economic Affairs Minister Wang Meihua chuan accident hi Taiwan chhim lama power plant-ah a thleng tih a sawi niin sorkar nena inzawm, Central News Agency chuan a tar lang.
Ministry chuan he thil thleng hi rang taka ngaihvenin a buaipui nghal tih a sawi bawk.
Power awm lo hian Taiwan-a chhungkaw maktaduai nga vel zet a tibuai hman niin a sawi.
Sorkar enkawl power operator Taipower chuan chhim lama Kaohsiung khawpui bul, Xingda power plant-a transformer pakhatah eng emaw a thleng palh niin an sawi a. A chhiat thuta hman tura tih backup an tinung tawh niin a sawi.
He power plant hian Taiwan-in power a hman hmun 10-a thena hmun sarih vel zet a pe chhuak niin a sawi.
Taiwan-a hmunpui nei, khawvel contract chip siamtu lian ber, TSMC chuan an plants chuan ‘power hniam thut’ an tawng fo tih an sawi a. Eng emaw thleng palh thei a awm hlauvin an inendik reng thin niin an sawi bawk.
Ningania thuthar lakhawmtute a kawmnaah Wang-i chuan power awm loh avangin hriat thiamna a dil a, thliarkar hmar lam chuan power hi chhun lai velah an neih leh hman thu leh chhim lam pawhin chawhnu herah an neih leh hman thu a sawi bawk.
United States secretary of state hlui, Mike Pompeo nena inkawm tura tih vek pawh, Taiwan President Tsai Ing-wen-i pawhin livestream-a Pompeo nena an inkawm tur hi power awm lo avangin chawpchilh taka thulh a nih thu Facebook-ah a tar lang.
Tualchhung chanchinbu, Taiwan News chuan Ningani chawhma lamah khan khawlaia kawng pengthuam chu a buai hle tih a tar lang a. Traffic lights a awm loh avangin lirthei khalhtu leh kea kal an buai hle.
Lirthei kal vel vil turin traffic police tirh chhuah an ni a, lift-a tangte chhanchhuak turin fire truck tirh chhuah an ni bawk tih a tar lang.
Thliarkar ram hian tun anga power neih loh thup hi an lo nei tawh thin a. Kum 2017 pawh khan chhungkaw maktaduai 6.68 vel an lo thim thup tawh a ni.