Nimin khan Champhai district-a Mualkawi ram chhung, Sapianmaksakah kawng siam company tipper (Hyva) leh bike an insu a, bike-a chuang mi pahnih an thi.
Thudawn danin, nimin zing dar 6:30 vel khan Champhai atanga Zokhawthar panna kawng, Champhai atanga km 14 vel, ZNS Farm, Mualkawi ram chhung, Sapianmaksak kiangah Yamaha FZ, MZ-01/V-0378, Lalbiakmuana (23) leh Lalawmpuia (36), Sazep khua ve vete chuanna leh National Highway No. 6 sial hna thawk mektu, Sri Balaji Construction company truck MZ-04/A-6832, Pradeep Kumar (34), Hazaribagh, Jharkhand khalh chu na takin an insu a. Motor cycle-a chuang mi pahnihte hi truck hnuaiah inbarh lutin a hmunah hian an thi nghal a ni.
An ruangte hi Champhai District Hospital-ah post mortem a nih hnuin an khaw lamah thawn a ni a, nimin khan Sazepah vui an ni.
Champhai Police Station atanga thudawn danin motor cycle khalhtute hian an motor hi thunun zo lovin truck hnuaiah hian an inbarh lut niin a lang a, truck driver hi a tirah a tlanbo a, tunah chuan police station-ah an kawl tawh a ni.