Aizawla Govt Complex huam chhungah pass nei loa in ding 403 a awm a, in tam tak din tawhnaa LSC pek mumal loh chungchang hi Eight Legislative Assembly chhung ngeia chin fel a duh thu Assembly Speaker Lalrinliana Sailo chuan house-ah a sawi chhuak.
Budget Session neih meka March 3, 2022-a zawhna leh chhanna hunah ZPM MLA Lalduhoma chuan Govt Complex chhunga LSC pek mumal loh chungchang hi revenue minister a zawt a, hemi chungchang hi speaker chuan sawi zuiin helai hmuna in 400 chuang ding tawh chu cancel theih tak tak a rin loh thu a sawi.
Lalrinliana Sailo chuan sawi chhunzawm zelin hemi chungchang ngaihtuahtu tur committee din a tul thu leh chutiang tihpui tur chuan house member-te a ngen tih a sawi a, “Khutiang zat in ding khu kan thiat lek lo ang, Eight Legislative Assembly hian i ching fel ang u,” a ti.
Revenue Minister Lalruatkima’n zawhna a chhan danin kum 2019-20-ah Govt Complex, Luangmualah Cadastral Survey MIRSAC leh department thawk dunin survey an nei a, survey report atanga a lan danin, LSC nei 33, pass nei loa in ding 403, land lease pahnih, house pass paruk a awm.
Lalduhoma’n Govt Complex huam chhunga mi mal in ding tawhte LSC siamsak tawhte LSC siamsak tum a ni em tih a zawhna chu revenue minister chuan chhangin Govt Complex ram awm dan chu zirchian phawt a ni a, LSC siamsak chungchangah thutlukna a la awm lo thu a sawi bawk.
Govt Complex huam chhunga in ding tawhte LSC pek theih loh chungchang hi assembly session neih tawhah zawhna a awm fo tawh thin a, tun tuma chhanna ang bawk hi pek a ni fo.
Helai bawr bialtu MLA-te pawhin he thilah hian hma an lo la tawh thin a. June 15, 2018 khan khatih laia Aizawl West I Bialtu MLA, K. Sangthuama’n Govt. Complex-a inhmun neite LSC siamsak turin sorkarah tum eng emaw zat a thlen tawh thin thu Govt. Complex Branch YMA Day lawmna a hmanpuinaah a lo sawi chhuak tawh.
Hemi tum hian K. Sangthuama chuan, “Kumin (2018) assembly inthlannaa neih huna thuneihna kan chan chuan Govt. Complex-a in neite LSC siamsak kan tum,” tiin a lo sawi chhuak tawh bawk a ni.
///////////////