Nimin kha Mizote kût ropui ber, Chapchar Kût a ni a, hri leng avangin kum dang anga mipui pungkhawm tam zawnga hman theih a nih loh avangin a tum hnih nan ‘virtual programme’ hmangin hman a ni.
Aizawl Vanapa Hall-a Chapchar Kût lawmnaah hian Art & Culture Minister R Lalzirliana chu kût thlengtu a ni a, Chief Minister Zoramthanga chu kût pa a ni a, kût hmanna hi mipui en theih turin TV-a live-a pek chhuah niin, kumin Chapchar Kût thupui atan ‘Zonun Zemawi – Rinawmna’ tih hman a ni.
Kût pa, Zoramthanga chuan Chapchar Kût thupui, ‘Rinawmna’ chu mihring dam chhung atana pawimawh ber pakhat a nih thu sawiin, “Rinawmna hi mi mal nunah, kan hnam nunah, kan chhungkaw nunah, keimahni ni tin eizawnnaah te kan nunna tipuitlingtuah thlang ila,” a ti.
Zonun zemawiah huaisen a tha, zaithiamna a tha, lehkhathiamna a tha, a pawimawh ber pakhat chu rinawm a nih thu sawiin, “Mizo hnam hi an rinawm a ni min ti se a duhawm ber a ni,” tiin a sawi.
Chief minister chuan Chapchar Kût chu harsatna, hrehawmna hnehna atana lo kal chho ta nia sawi a nih thu leh tun hnaiah Mizoramin hri leng, ramri buai leh thil danga harsatna chi hrang hrang a tawh karah Chapchar Kût chu entawn tlaka hruai luttu ni tura hman theih a duh thu a sawi bawk.
Kût thlengtu, Art & Culture Minister R Lalzirliana chuan thangtharten Mizo hnam nun ze mawi tak – rinawmna te, tlawmngaihna te, aia upa zahna te an theihnghilh ta deuh tih sawiin, “Hmasawnna lo thleng zel karah kan hnam nunte hi theihnghilh kher loh tur,” a ti.
Thangtharten Mizo hnam zia rang tilang thei hla tha tak tak takte an hriat thar a, nakum Chapchar Kûtah chuan chung hlate chu kût hmangtuten an sakho dual dual theih nan Art & Culture-in hma a la dawn tih a sawi bawk.
Kût lawmnaah hian Synod Moderator Rev Dr Vanlalnghaka Ralte chuan hunserh hmangin Central YMA President R Lalngheta leh Art & Culture Director R Hmingthanzuala ten thu an sawi a, rimawi chi hrang hrang leh Mizo pi pu zai te, Mizo hnam lám chi hrang hrangte entir a ni.
&&&&&