Lungsen khua a Independent Chanchinbu awmchhun ni mek Chawlhkar tin chhuak, Lungsen Post kum 10 tlin lawmna chu nimin khan Lungsen Chhimveng YMA Branch Hall-ah neih niin, MJA President Pu Zonunsanga Khiangte chuan khuallian niin a hmanpui a, Pu Laltlanthanga, President, MJA District Hqrs. Lunglei chu Khualzahawm a ni.
Khuallian Pu Zonunsanga Khiangte, President MJA Gen.Hqrs chuan, Mizoram Journalist te hi kan inpawhin kan inban ngam a, keini pawl aia inpawh hi an awm ang em tih tur a ni. Kan tuar pawh a feiin sum leh paiah kan tui hal huam huam lem lova, Chanchinbu hi a mah leh a mah intum zawh loh chang a tam thin hle a, Advertisement hi kan innghahna pakhat a nih laiin, kum 20 kalta chhungah khan Mizoram Budget-ah Advertisement atana sum dah hi za a pawisa 10 chauh te a ni. Nimahsela kan hna, mipui rawngbawl hi Pathian hian a rawngbawlnaah min pawmsak a, sorkar pawh kan thawhpui thain thawhpui zel kan tum bawk a ni, a ti.
Khualzahawm Pu Laltlanthanga chuan Chanchinbu enkawl hautak leh hahthlak zia sawiin “Kohhran leh khawtlangah inhmang ve duh pawh ni ila, kan hun neihin min daih lo fo a, mipuite hian min hriatthiam kan ngai hle a ni. Social media hian min run mek a, nghawng thalo tak tak a nei mek tih sawiin hman dan chintawk kan neih a ngai a ni” a ti.
Lungsen Post kum 10 tlin lawmna inkhawm hi Pu H.Lalthansanga’n kaihruaiin Pi C.Lalremruati DIPRO Lunglei, Pu Andrew-a SDEO Lungsen leh Pu F.Zosangliana, President, MJA Hnahthial ten thu an sawi bakah zaithiam ten kalkhawmte zaiin an awi a, Pu C.Lalremruata, Editor, Lungsen Post chuan Chanchinbu a buatsaih chhoh dan hrang hrang a sawi.
Lungsen Post hian an kum 10 tlina pual hian Lungsen khua atanga Zirna lam ti tha, Buh thar tam, leh Lehkhabu ‘Lungsen hlimthla’ ziaktute hnenah Award hlan a ni bawk.