Lengpui Airport chei \hat hnathawh mek chu Ningani tlai khan a chim a, PWD-in he hnathawktu contractor chu in rel lai chim siam \ha leh nghal turin a hriattir nghal.
Airport siam \hat mek chim chungchang hi Public Works Department chuan thuchhuah siamin an sawi fiah a. March 10, 2022 Niangni tlai dar 4:50 khan Lengpui Airport Terminal Building sira Baggage Make-up area sak mek chu a chim a, thi leh hliam na lutuk tumah an awm lo tih an tar lang.
In rel chim hi nimin zing khan contractor leh engineer-ten an enho nghal a, \ha taka siam \ha leh tur a hmalak nghal a nih thu tar langin, contract agreement ang ngeiin contractor hi sum sen belh awm lova siam tha leh tura hriattir nghal a nih thu an tar lang a ni.
PWD thuchhuahin a tar lan danin Baggage Make-up area sak mek hi a vaiin sq.m 520.02 a ni a. Heta \ang hian sq.m 238.50 hi slab chhun zawh tawh a ni a, a bâng, sq.m 281.50 hi chhun lai mekin a chim ta a ni.
He slab chhun lai chim chhan ber nia lang chu lei a\anga slab san zawng hi mtrs 6.00 lai a ni a, chu chu form work/shuttering chhawng thuma mau leh thing hmanga do a ni a, slab chhun lai a tihmuk nana vibrator an hman laiin a dona mau \henkhat hi a pelh palh a, chu chuan a slab chhun lai, sq.m 281.50 hi a tlakpui ta a ni.
Hna thawh chhiat vang liau liau : CLP
Vanduai vanga chhiatna thleng hi lo awm fo tawh \hin a, tuna Lengpui Airport chei \hat mek chim erawh hi chu hnathawh chhiat vang liau liaua a ni tih a chiang hle,” Congress Legislature party member-ten an ti.
March 10, 2022 tlaia Lengpui Airport chei \hat mek building chim chu CLP Leader Zodintluanga Ralte hoin Ngunlianchunga leh Lalrindika Ralte ten nimin zing khan an tlawh a. Building chim hi slab chiah chim anga sawi a nih laiin an endikna a\angin a bante pawh a tliak a, a bung a ni tih a hmuh theih tih an sawi.
“Hna a chhe em em a, a sakna hmanrua cement, balu leh rora a inchawhpawlh \ha lo hle a. Kan tlawh lai ngei pawhin a la ro \ha lo hle a ni. A ban leh beam-a rod hmante pawhin duhthu a sam loin a dik lo hle tih a lang bawk,” an ti.
CLP member-te hian Lengpui Airport chei \hat hna zawng zawng hi chief minister fachuam, Kamrula (Kamlova Chhangte – KR Construction) leh CM tupa, Zoramchhana te thawh vek a nih thu an sawi a. Hnathawhnaa tel ve ni ngeia ngaih theih turin CM pawhin Covid-19 avanga a zin chhuah ngam loh lai pawhin vawi tam tak a tlawh avangin, he chhiatna thlengah CM Zoramthanga hian mawh a phur thuk hle a an ngaih thu an sawi bawk.
Airport building sak lai mek sak dan \hat lohzia enin sak zawh a nih hmaa hna chhiatzia hriat chhuah a ni hian hnathawh tawh zawng zawngte pawh a \ha tawk lo ang tih a rin theih avangin endik leh vek phawt an duh thu an sawi a. He chhiatna thleng hi dan anga chhui a, mawhphurtute lakah hremna lek kawh ngei ni se tih chu an ngaihdan a nih thu Congress party chuan an sawi.
Lengpui Airport-a chanchinbu mite hmaah thu sawiin CLP Leader Zodintluanga Ralte chuan, “Mizoram hmasawnna atana project lian tak hi an thawh \an kan hriat tirh a\angin Mizoram mipuiten kan dem nasa hle a. Pawisa pawh a awm hma, work order pawh pek a nih hmain an duhsak zawng an thawhtir mawlh mawlh a. A hmunah ngei kan han en a, an hnathawh a chhe em em a, cement pawh awm mang loin a inchar \ha lo em em bawk,” a ti.
Chief minister-in a duhsak em avanga huangtau taka siam a nih vanga chhia a nih thu sawiin, “Congress sorkar lai khan, Pu Ruatkima, tuna RD Minister ni tain lei chimte tlawhin, huai takin, ‘Sorkar hnathawkte mawh a ni lo, a department changtu chief minister mawhphurhna a ni a, moral responsible lain a bâng ngam tur a ni,’ a ti \hin a. Tunah hian PWD changtu Chief Minister Pu Zoramthanga hi bâng turin a nawr ngam leh dawn em tih hi ka zawt a ni,” a ti bawk.
CLP team hi MPCC Media Department hotute leh MPYCC hotuten an \awiawm a ni.