- SEDP-ah film leh painting chu trade-a dah a nih theihna tura ruahmanna siam tel a ni ang : Ruatkima
Information & Public Relations (I&PR) Department, Mizoram Film Forum (MFF) leh Ailawng khawtlang thawhhonaa siam, Ailawng Film City chu nimin khan I&PR Minister Lalruatkima’n a hawng.
Film city peng pakhat, film shoot/siamna atana set-a hman theih tur Zokhua pawh I&PR minister hian a hawng nghal a. Khawvel hmasawnna hrang hrangin a ken zingah film chu thil pawimawh tak, khawvela hnam hrang hrangten hnam tih dan leh nunphung an inhriatpawhna hmanrua a nih thu a sawi.
Film siamah hmasawnna a awm theihna turin mawhphurtu, nodal department-te awmin, sorkarin theihtawp chhuahin \an a la tih Lalruatkima chuan a sawi a. Ailawng khawtlangin hmathlir thui tak neia film city ruahmanna tihpuitlin kawnga theihtawp chhuaha an ramte an sahthlak avanga lawmawm a tih thu a sawi.
I&PR minister chuan film chu eizawnna tling a nih thu sawiin, SEDP-ah pawh film leh painting-te chu trade-a dah a nih theihna tura ruahmanna siam tel a nih tur thu a sawi bawk.
I&PR Director Lallianpuii’n Ailawng Film City \obul sawiin, Ailawng khaw pum leh a chhehvel chu film shooting-na atana hman theih tura buatsaih chu a tum ber a nih thu a sawi a. Mizo zia leh khawtlang nun pholang thei tura duan chu a tum pawimawh tak a nih thu a sawi.
Film lama technology danglam dan sawiin, I&PR director chuan OTT platform LPS-in nakin lawka an chhawpchhuah tur chu Mizo film siamtute tan sum bakah talent zau zawka phochhuahna kawnga thil tangkai tak a nih a beisei thu sawi bawk.
Sorkar thuchhuahin a tar lan danin, kum 2018-ah Ailawng khawtlang nen inbe rawna Ailawng khua chu film city-a puang turin inremna siam a ni a. Sorkar hmasain NEDP a\angin a sakna tur sum a ruahman a. Ailawng ram chhunga Zokhaw sak zawh tawh chu vanduaithlak takin January, 2021 khan a kangral vek a. Hemi hnu hian hmathar la lehin Zokhua chu din thar leh a ni.
Zokhaw bulah Mizoram Film Forum Film Facilitation Centre, Assam type building a awm a, Ailawng Hall chu Khuangchera Theatre cum Multipurpose Hall-ah puan niin, film chhuahna atana cheibawl a ni. Zokhua hi a duh apiang tan man chawia tlawh theih a ni bawk.