Aizawl: ZPM Legislature Party Secretary Dr Vanlalthlana’n Aizawl Civil Hospital-a CT Scan khawl thla ruk dawn hman theih tawh loh chu pawi an tih thu sawiin, “Sorkar kalphungah chawplehchilha thil tih rum rum theih a ni lo tih hre mah ila, mipui mamawhna a nasat em avangin a rang lama hman theih turin sorkarin hma la se kan duh,” a ti.
Aizawl Civil Hospital-a CT scan khawl rei tak hman theih tawh loh chu nimin khan Dr Vanlalthlana hovin ZPM hruaitu dangten an tlawh a. Dr Vanlalthlana chuan “Mipui tawrhna leh hrehawmna hi sorkar tawrhna leh hrehawmna ni se, natna neite nat rual hian kan sorkar hi na ve se tih hi CT Scan khawl hman theih loha awm, a hmun ngeia kan tlawh chhan a ni,” a ti.
Dr Vanlalthlana chuan “Mipui mamawh lian tak, nunna leh thihna hril thei, damlo inenkawlna khawl pawimawh hun rei tak hman theih loha awm hi ZPM chuan pawi a ti hle a, mipuite aiawha dingin Aizawl Civil Hospital CT Scan hi a enzui reng dawn,” a ti bawk.
Aizawl Civil Hospital-a CT Scan khawl chhia ennaah hian Dr. Vanlalthlana leh ZPM PAC member TBC Lalvenchhunga te bakah ZPM vigilance department leh media & publicity department aiawhte an kal a, Directorate of Health & Medical Education-ah thil awm dan an zawtfiah nghal bawk a ni.