Rin loh leh beisei loh takin boruak a inthlak danglam thut a, khua a êng a, a lum chho viau dawn maw tih laiin zan khat thil thuah thlasik vawt lai ber ang maiin Zoram boruak pawh a danglam a, a vawt chu thu hran, ruah a tel hian kan inchei dan phung a rawn tidanglam thut a ni ber e.
Fur ruahtui tla pangngaiah chuan ruahtui hnawng laka him dan inkawhhmuh mai kha awlsam mah se, fur ruahtui mai ni lo, thlasik vín tak nen a inpawlh tlat avangin, mi tam tak tan inchei a buaithlak phah viau, a pawimawh ta bera chu, lum si, ruahtui laka min hum thei ni bawk incheina inbel a ni mai. Chung ang incheina chu i lo belchiang dawn teh ang.
‘Trench coat’, coat satliah a ni lo, raincoat kan tih mai ṭhin kha designer lian ten, a nalh vang ngawih ngawih pawh ni loin, mamawhna avang zawkin, fur leh thlasika min humhim turin coat fual mawi tak tak, design tunlai bawk si, Trench coat an rawn siam chhuak a, secondhand-ah te kan hmu nasa, mi nawlpui tan 1500 vela coat ṭha tak neih theih kha a na lem lo, a tunlai tel bawk nen. China leh Bangkok lam aṭangin kan sumdawng ten a variety tam lutuk lo an la lut nual a, belhchian pawh an chakawm hle. A ṭhat lehna riau chu, a hmei a pa tan incheina tling tak anihna hi a ni. I inchei dan ṭhin pangngai chunga hak thuah kha a pawi miah lo, in chhung, khawi maw office leh inah te chuan phelh rih mai tur. A lawng pawn incheina tling a ni a, a hnuaiah kekawr tlawn pangngai, denim emaw cotton jeans pawh mipa lam tan hna kal leh zan lam inkhawm ni khuaah hak a pawi miah lo, emaw hmeichhe lam tan a trench hlang kha kawrfual anga hak a, stockings emaw leggings nen, pheikhawk sang emaw i chhuahna tur azirin boots leh converse te nen pawh a pawi miah lo. A nalh duh phian.
Ruahtui hian thli a ken tel deuh avangin, thli thaw-in i sam a tihro emaw i style a tihchhiat loh nan, ’beanie cap’ te pawh khum a pawi miah lo, ’Scarves’ kha theihnghilh lo bawk la, a bikin two wheeler khalh tan. I scarves bah a zir khan i incheidan a danglam viau thei bawk. Chirhdiak rahpui atan chuan i pheikhawk ṭha kha i ui deuh a ni thei e, a awm ve tho mai, ’willies boots’ an tih ho hi ruahtui ngam tura duan an ni, lo chhuih chhuak teh, heng rubber aṭanga siam ’jellies’ ho hi boot chauh ni lo, flats, ballerinas leh pumps te chenin hmuh tur a awm tawh. Jellies kan sawi ta sa sa…
’Waterproof sana ‘colourful deuh tak, tunlaia kan uar ‘neon color‘ ang chi te hi lo bun chhuak teh, kan boruak nen a inmil. I mobile te, i thil pawimawh dang te kha le??!! Khawiah nge i dah him tak ang?? khawii maw i kal lai ten ruah lo tla thut se…Harsa lo te mawle! ’Waterproof tote bag’ emaw ’backpack‘ te chenin hmuh tur a tam tawh a nia. Kan showroom lian hoah hian enchhin la lei tur a awm nual ang. I nitin mamawh i ken chhuah tur i make up leh lehkha pawimawh te kha lo khungkhawm tawp mai la, ruahtla lakah an him hrim hrim.
Sawi hmaih theih miah loh i ‘nihliap’ngei mai kha, lo hawl chhuak teh! A folding ai chuan a hawl a hawl kha a tunlai. Print nalh tak tak designers version thlengin kan hmu ve ta…incheina pakhat a nih kha..ilo belchiang dawn nia.