Huan, lo, ram kaihhnawih document-te information technology (IT) hmanga dah thatna leh chhinchhiahna tur -Computerization of Registration, National Generic Documentation System chu nimin khan Land Revenue & Settlement (LR&S) Minister Lalruatkima’n Lungleia hman turin a hawng.
Minister chuan lehkha pawimawh hrang hrangte chu rukruk, kangmei leh chhiatrupna thleng thei lakah tun lai thiamna hmanga vawn that a tul thu a sawi a. ‘Computerization of registration’ hmangin in hmun leh ram, sorkara chhinchhiah leh a kaihhnawih thilte awlsam zawka mipuiten an tih theih tawh tur thu a sawi.
Lalruatkima chuan, “Kan hmunhma lehkha pawimawhte computer hmanga vawn vek an nih tawh dawn avangin in hmun lei leh hralh thu-ah te, document bo thu-ah te thlengin he hmalakna hian nasa takin min tiphuisui dawn a ni,” a ti.
Lunglei Municipal Council (LMC) din tura hmalakna chungchang pawh sawiin minister chuan sorkarin theihtawp a chhuah mek tih a sawi a. LMC chu Lunglei khawpui hmasawn zelna tur leh khawpui ruhrel changtlung zawk neih theihna tur a nih thu sawiin Lunglei mipute chu hmalakna phur taka lo tawiawm tur leh hlawhtling taka kalpui a nih theih nan sorkar finchhuah leh thawhhopui turin a sawm.