Ukraine-a Chernihiv region governor chuan an sipai chettirna an tinep tawh dawn tiin Russia-in intiam mah se a tak takah chuan a ni chuang lo tih a sawi.
Governor Viacheslav Chaus chuan BBC hnenah Russia intiamna chu a rin loh thu a sawi.
“Kan lo hriat tawh \hinah an sipaite hian vawi khat mah an thutiam an la tihlawhtling ngai lo,” a ti.
Chernihiv leh a chhehvelah hian zankhuain beihna a thleng niin Chaus-a chuan a sawi.
“Nizhyn leh Chernihiv an bei a, an beih nasat ber chu Chernihiv a ni a. Civil mite hmunhma an tichhe nasa hle,” a ti.
“Chernihiv hian electric, tui leh intihlumna a la nei lo zel a. Heng thilte hi siam \hat leh a la harsa hle a. Nizan bikah khan sipai hmun pakhat mah beih a ni lo va, civil mite hmunhma chauh an tum a ni,” tiin governor chuan a sawi.
Governor sawi hi a dik em hriat ni lo mah se Chernihiv-a cheng dangte pawhin inbeihna a thleng reng tho niin an sawi.
“Zan rapthlak tak a ni,” tiin mi cheng pakhat chuan BBC hnenah a sawi a. “Zankhuain daiah inbeihna a thleng a, laipui rite pawh hriat tur a awm a, thlawhna lam thawm erawh a reh,” a ti.
Mi cheng dang pakhat chuan zan lam mai ni lo, Nilainiah pawh chhun lama laipuia kah an la ni reng tih a sawi bawk.
Thawhlehni khan Russia chuan Chernihiv leh Kyiv khawpui chhehvela an sipai chettirna chu an tawpsan hret hret dawn tih sawiin hei hi inremna tura inbiakna tihchakna atana an tih a ni.
Russian Deputy Defence Minister Alexander Fomin chuan heng hmunah hian a tahtawl zelin sipai chetna chu tihnep a ni dawn tih hi a sawi a ni.
Hetianga an intiam hnu lawkah hian Kyiv khawpuiah chuan air raid siren a ri nghal thung.
Kyiv Deputy Mayor Mykola Povoroznyk chuan khawpui ber hi chu zankhuaa kah a nih loh thu a sawi a, silai puak thawm erawh hriat tur a awm reng tih a sawi.
United States leh Ukrainian thuneitute chuan Russia hian a sipaite hi Kyiv a hlattir hret hret niin an sawi a, khawchhak lama beihpui thlak an tum nia an ngaih thu an sawi.
Russian leh Ukrainian palaite chu Thawhlehni khan an inbia a; mahse, inremna tak tak tur engmah an la sawi chhuak lo niin Kremlin chuan a sawi.