Vawk lakluh kawngah fimkhur a la ngai reng
Vawk hri leng a hluar thar leh nia sawi a ni a, he hri African Swine Fever (ASF) vang hian vawk thenkhat an thih phah leh tawh bawk. Vawk vulha eizawngtute an mangang a, sorkar in inkaihhruaina a siamte ennawn that leh an duh thu an sawichhuak hial.
Tin, district dang leh hmun dang atanga phalna neia vawk lakluh phal a ni a, phalna nei lo tan khauh taka dan kenkawh a ni bawk a, he dan hi zawm hram hram ila, sorkar hriatpuina tel lova dan lova sumdawngte vang bawk hian harsatna kan tawk leh thin tih hriatthar a tha hle bawk.
Tun hnai lawk pawh khan an thudawn bawhzuiin Thenzawla Vety department hotute chuan, Champhai district Zokhawthar atanga vawk phurhte chu Thenzawl luh hma, Tourist Lodge bulah lo tidingin an endik a. Vawk phurtute hian sorkar thupek anga department atanga vawk lakluh phalna lehkha engmah an neih loh avangin vawkte hi an phurh lettir leh a ni.
Hetih lai hian vawk phurtute hian vawk neitu, Zokhawthara mi pathumin an vawk vulh lai ngei a ni tih pawmpuina lehkha, Zokhawthar VCP-in a hming ziakhnan a, seal a chhut hnan lehkha chauh an nei thung. Hei hian fiahna a paltlang zo lo tih vety hotute chuan an sawi a, sorkar dan siam zawm hram a pawimawhzia kan hriat thar hlawm pawh a tha awm e.
Sorkar in inkaihhruaina tha tak mai a siam a, he vawk hri leng hi a la reh fel miau loh avangin khauh taka kenkawh a, mipui lam pawhin dan siamin a phut ang ngeia chet kan lak ve thiam pawh a tul hle awm e. Kan zavaia tan a ni si a.