Tun season a trophy pali chawi tum Liverpool in UEFA Champions League quarter-final second leg-ah goal hnih a hma hruaiin bul an \an thei dawn a. Benfica hmachhawnin 3-1 in Portugal-ah hnehna an chang.
Lisbon khawpui a Estádio da Luz-ah Liverpool an khel\ha hle a. Benfica goalkeeper Odysseas Vlachodimos che \ha lo se semi-final lut chiang tawh tlukna ngaih theih tur khawpin goal khungna hun\ha an ngah.
Ibrahima Konate chuan minute 17-naah corner a\angin an goal hmahruai a tauh lut a. Minute 34-naah Sadio Mane-a’n an goal hnihna khung lehin first half chu Reds ta a ni.
Benfica mualah anmahni \antute thawm ring tak chu first half tawp lamah a chuai hman hle a, amaherawhchu entute tiphur thar leh turin an striker ngaihven hlawh tak Darwin Nunez chuan Konate tihsual a\angin goal khat a khung.
Benfica an phur sawt a, beisei tur neiin an inngai. Nimahsela Premier League club zawkin player an neih \hat an chhawr a. Luis Diaz chuan an goal thumna khungin inkhel a dah\ha.
Anfield-ah second leg hi kar leh Nilaini zanah an khel leh ang.
Liverpool duhthusam
Tun season-ah trophy pali chawi an tum a, chumi tur erawh chuan Reds in fiahna hautak an hmachhawn dawn. He fiahna hi tunkar a\ang a in\an ang.
UCL inkhel bakah Pathianni zanah Premier League hmahruaitu Manchester City nen an inkhel dawn a, ni ruk hnuah FA Cup semi-final-ah an intawng leh dawn.
Benfica lakah hian chawlhlawk hma in an khel\ha hle a, goalkeeper Vlachodimos chuan Diaz bakah Mohamed Salah leh Diogo Jota te goal khung ngei tur a dansak.
Second half a goal an neih hnuah erawh Benfica an phur a, Everton leh Nunez te goal khung tur Alisson chuan a dansak ve ngai a. Inkhel tawp hma a Diaz-a goal khung chu Reds tan a pawimawh hle a. Minute 180 chhung inkhel tura engkim thlak danglamtu a ni.
“Mumang ramah kan cheng thiang lo”
Liverpool manager Jurgen Klopp chuan hnehna chiang takin chang mahse an hmachhawp a la zo lo tih a sawi nawn.
“Champions League-ah helai hmuna away team ni a chak hi thil harsa tak a ni. Benfica kha thih tha in an \ang a, \ang tur reng pawh an ni.”
“Huntawp hma chiah khan khung belh thei kan ni a, goal li khung ila chu kan dinhmun a thawveng deuh ang. Mahse mumang ramah kan cheng lova, kan dinhmun hi kan chian a ngai.”
“Halftime chauh a ni a, kan khingpuite kan hriatchian phah a, chak tumin theihtawp an rawn chhuah leh dawn. Ajax-ah an chak a, group stage-ah result \ha an mamawh apiangin an sualchhuak ziah bawk. Kan inpeih a ngai.” a ti.