Petrol leh Diesel-a harsatna chinfel thuai a tul
Mizoramah petrol leh diesel lut a awm rih loh avangin pump khar a ni nual ta mai a, hei hi Mizoram IOCL Transporter Forum leh IOCL inkarah tuialhthei/POL phurh man chungchangah inrem theih lohna a awm vang a ni. Nunphung tam tak a buai phah a, petrol leh diesel man a lo sang chho ve zel bawk nen, ngaihtuah ran a ngai khawp mai.
Nitin kan khawsakna kawngah hian lirthei kan chelek nasa a, kan khawpui ngei pawh lirthei tlan hleih theih loh khawpin jam a awm nasa bawk. Heti khawpa lirthei kan ngah leh hman nasat a nih miau avang hian petrol leh diesel khaihlak thut ta mai hian mi tam tak nunphung a tibuai a, sorkar pawhin pump atanga lak theih zat bituk ngawt lo deuh leh chinfel ran dan kawng a zawn a, ruahmanna a siam leh thuai a tul hle.
April 1, 2022 atang khan Mizoramah tuialhthei/POL lut a khaihlak a. Hei hian nghawng lian tak neiin mipuiin tuialhtheiah harsatna an tawk mek a. Hei hi hriain sorkar chuan rualkhai zawka mipuiten an inchan theih nan petrol leh diesel control order a tichhuak leh ta bawk. Ruahmanna leh thupek tihchhuah zung zung hi thil harsa a ni lo, sorkar pawhin a tih ngei tur a ni. Chutih rual erawh chuan nunphung khaihlak thak khawpa kan awm loh nan ruahmanna leh inrem lohna hrang hrangah inremna a awm theih nan nasa zawkin hma la se la, mipuite harsatna awm thei lakah hian min chhanchhuak thuai teh se.
Mipui lam pawhin kea kal intihhmuh thar ila, tuialhthei renchem leh hman tlem kawnga inzirtirna atan lo hmang hlauh thei ila, midangte tan zirtirna tha tak kan nei a ni bawk ang. Tin, kan hriselna atan pawh hian a tha em em bawk a ni.