Auto Corner
by Ruata
Maruti Suzuki chuan an MPV changkang leh tha tak mai, NEXA atanga an hralhchhuah XL6 leh a hnuai chiah tia sawi theih Maruti Ertiga chu kum 2022 model thar tichhuak turin ruahmanna an siam mek a. Report thenkhat chuan tun thla chhunga tihchhuah hman a nih tur thu an sawi mek bawk a ni.
Maruti Suzuki lirthei chhuak mai tura beisei pahnih 2022 Maruti Ertiga leh 2022 Maruti XL6 te hi a landan leh thil dang dang tuaithar facelift model an ni ve ve dawn a. Tuna chhuak mek nena a danglamna tur te pawh kimchangin kan hriat thuai theih a beiseiawm a ni. Multipurpose Vehicle (MPV) emaw Multi Utility Vehicle (MUV) emaw tia sawi hi lirthei huang pakhat niin he huang hi lirthei mihring phur tam emaw lirthei tangkaina tam tih te pawhin a sawi theih ang a. Toyota Innova, Mahindra Marazzo, tih ho te hi he huanga lirthei lar zual an ni a, Maruti Eeco te pawh hi a rinluh theih hmel bawk.
Maruti Suzuki hian a tirah MPV huangah hian Ertiga hi a nei phawt a, a hnuah Ertiga tihchangkan hret model, XL6 hi NEXA atanga hralhchhuah turin an tichhuak leh bawk a. A pahnih hian market-ah an lo awm rei veleh tawh a, company chuan hmelthar nena tihchhuah a hun leh tawhah an ngai aniang chu, tunah hian 2022 facelift model kan hmu dawn ta a, a nghahhlelhawm viau a ni. Report thenkhatin an tarlan danin tun thla kar 3-na velah hian tlangzarh a ni ang a, ni 21 chhoah hian showroom hrang hrangah a hmuh theih tawh dawn a, chiang zawkin company lam pawhin thu an rawn neih thuai a rinawm a ni.
2022 XL6 leh 2022 Ertiga
He MPV hmelthar nena rawn chhuak leh tur hian khawl ngai, 1.5 litre, 4 cylinder naturally aspirated petrol khawl a hman beisei a ni a, he khawl hian 103bhp power leh 138Nm torque a pechhuak thei dawn a ni. Tuna chhuak mekah hian transmission lamah 4-speed torque converter automatic gearbox chu automatic bika tihchhuah a ni a, a tharah thung hi chuan 6-speed automatic a awm tawh beisei a ni a. Manual lamah chuan a hmaa awm ang tho, 5-speed manual duhthlan tur a awm.
6-speed automatic transmission thar awm tura beisei hian performance-ah a pui nasa dawn hle niin report hrang hrangin an tarlang a. Maruti MPV thar tur hian lirtheiin petrol emaw diesel emaw a hehzawng khuahkhirhna pakhat Corporate Average Fuel Economy (CAFÉ 2) norms an rawn zawm thei dawn bawk a ni.
2022 Maruti XL6 leh Ertiga-ah hian hmelthar model tur a nihna angin an landanah pawh danglam a awm neuh neuh dawn a. XL6-ah hian a hmalamah grille thar leh bumper tihdanglam deuh te kan hmu ang a. Indonesian model ang deuhin alloy wheel lian zawk a nei maithei bawk. Ertiga-ah pawh danglam neuh neuh a awm ang.
MPV thar tur te hian lirthei chhung lamah chuan seat thar mawi leh dak nalh tak, 9-inch touchscreen infotainment system – wireless Apple CarPlay leh Android Auto awm tel bakah, wireless phone charging, leather seats, automatic air conditioning leh air-conditioner control thar te a nei tura ngaih a ni bawk. Hei bakah hian Maruti Suzuki XL6 hi mi 7 chuan theihnain a lo chhuak maithei niin report thenkhat chuan an tarlang bawk.
A chhung leh a pawna a kentel leh a hmelhmang tur hi lirthei thar tur pahnihah hian hriat hran fak fak theih a la ni lo a, engpawh ni se a man a inan loh angin a kentel te pawh a danglam ve zel dawn a, kan han tarlan tak te pawh hi pakhata awm, pakhata awm lo te a ni zut dawn a ni.
Company atangin 2022 Maruti XL6 facelift chanchin hi official-in kimchang takin kan hmu thei thuai turah beisei ila. India rama lirthei hralh hnem ber leh ramchhung company ngei atangin an lirthei tha leh tangkai tak pahnih chu a chi thar kan hmu leh dawn ta a. Lirthei leitute tan duhthlan tur tha, thar leh changkang zawk an rawn chhawpchhuak leh tur hi thil lawmawm tak a ni.