India khawpui, Delhi-ah chuan ni kaw chhung lawm tur, Hindu kût, Navratri chhunga ni hnih chhung chu sa dawr khar turin tual chhung roreltuten an ti a, hei hian mipui tam tak a tithinrim.
South leh east district-a mayor-te chuan kût chhung hian mipuiin sa an ei chuan loh thu leh mi tam takin hetiang hn laia khawlaia sa lei tur lo zawrh chu \ha an ti lo niin an sawi.
Sa zawrh khapna hian mi a tithinrim hle thung a, social media-a sawi chhuak an tam hle a. Tam tak chuan India-a sakhaw zalenna a palzut niin an sawi.
Navratri hi pathiannu, Durga-i’n ramhuai, Mahishasura a hneh lawmna niin ni kua chhung hman \hin a ni a. Hindu sakhaw la urhsunte chuan kût chhungin sa an ei ngai lo va, purunvar, purunsen leh thak lam chi an chaw-ah an telh ngai lo bawk.
Delhi-a rorel lai, Chief Minister Arvind Kejriwal-a kaihhruai, Aam Aadmi Party sorkar chuan sa dawr kharna tur thupek hi a chhuah lo va. Khar tura titu mayor-te hian April 11 thleng khar turin an ti a, a titute hi Hindu nationalist BJP (BJP) mite an ni.
Khapna hian huat a hlawh hle a, miin sa an ei loh avanga mi dang zawng zawngin an duh anga ei theihna zalenna an neih khapsak chu an sawisel nasa hle.
MP leh Trinamool Congress party hruaitu, Mahua Moitra chuan, “Danpuiin ka duh zawng sa ei phalna min pe,” a ti.
Jammu & Kashmir chief minister hlui, Omar Abdullah chuan hetiang a nih chuan Muslim thla thianghlim, Ramadan hun lai pawhin Muslim tamna hmunah chuan Muslim ni lote leh khualzin mite pawh chaw ei khapsak ve turin a ti.
Mi \henkhat chuan purunvar leh sen hralh leh lei khap si lova sa chauh khap chhan an zawt a, “Engvangin nge sa chauh?” a ti.
Twitter-ah pakhat chuan, “Sa hi khualbukah chuan sem reng a ni ang a, online-a zuarte pawhin an pe thei reng bawk ang a; mahse, Hindu rilru chuan Muslim mi retheiten an zawrh chu a ngaimawh tlat si,” tiin a ziak.
April 4 khan South Delhi Municipal Corporation (SDMC) Mayor Mukkesh Surayan chuan kût laia sa zawrh khapna a tichhuak a. East Delhi Mayor Shyam Sunder Aggarwal chuan a tichhuak zui ve bawk.