Mizoram IOCL Transporter Forum-ten tuialhthei an phur loh avangin tuialhtheiah harsatna a thleng mek a, he harsatna sukiang turin sorkarin MIZOFED leh police tank lorry-te chu tuialhthei a phurhtir dawn.
Tuialhtheia harsatna thleng mek chungchang ngaihtuahin nimin khan Supply Minister K Lalrinliana pisaah supply department hotute leh police hotute an \hukhawm a, tuialhthei phurh luh a nih lo reng chuan harsatna lian zawk a thleng thei tih hriaiin MIZOFED leh police tank lorry-te chu tuialhthei phur tura tirh an rel.
Hemi chungchanga The Zozam Times zawhna chhangin supply minister chuan IOCL Transporter leh IOCL te tuialhthei phurh man chungchangah an inrem theih loh avangin Mizoramah tuialhthei phurh luh a awm lo tih sawiin, hemi avang hian tuialhtheiah harsatna a thlen mek thu a sawi.
Mizorama tuialhthei phurh luh a nih loh zel chuan buhfai phurh leh thil dangah harsatna a thleng thei tih sawiin, mipuiin harsatna lian zawk an tawh loh nan sorkarin a tih tur a ti zel dawn tih a sawi a, “Tuialhthei phur tur pawh ruahmanna kan siam fel tawh,” a ti.
Tuialhthei chungchanga harsatna thleng mek hi company leh transporter inkar a nih thu minister chuan sawiin sorkarin thuneihna a nei lo a, chutihrual chuan he thil thleng chungchang hi ministry lam pawh hrilh hriat an tum thu a sawi.
Supply minister chuan he harsatna thleng mekah hian state sorkarin tih theih nei tam lo mah se mipui tawrhna thleng mek erawh a en liam mai dawn lo tiin, tuialhthei chu a theih ang ang phurh luh a, a \ul a nih chuan Vairengtea tank lorry dan mekte pawh chhuahtir tura hmalak a nih thu a sawi bawk a ni.