Ed Sheeran chuan pop star te chu copyright thubuai hlin a, bitum awlsam tak anga awm phalsak an ni tur a ni lo, tiin hla thluk ruk thubuaia hnehna chang hlim hlawl hian a sawi.
High Court judge chuan a hla hit, ‘Shape of You’ chu Sami Chokri ‘Oh Why’ atang lakchhawn emaw a ruka copy a nih loh thu thlutlukna a puan hnu-ah Sheeran chuan Insagram-ah, “He thutlukna hian hun lo la awm zel turah awmze nei lo leh innghahna awm lo inpuh kual velna mai mai pumpelh a nih theihna tura hmahruaitu a nih ngei ka beisei.. Heti anga inpuhna mai mai hi a tawp hlen ka duh hle a ni,” a ti.
‘Shape of You’ hi 2017 kuma UK-a hla hralh kal ber niin, Spotify-ah hla stream nasat ber a ni bawk.
Milar dangte pawh buai
Sheeran tan hla ruk thubuai a hmachhawn vawikhatna a ni hauh lova, zaithiam lar tak takte pawhin tunhnai khan an hmachhawn zut zut mai a ni. Thla hmasa khan Katy Pery chuan 2013 kuma hla hit, ‘Dark Horse’ thubuai ah eight-note riff a ru, tia an khin buainaah hnehna a chang.
Dua Lipa pawhin a hla lar, ‘Levitating’ vangin vawi hnih thubuai a hmachhawn bawk a, nikuma US-a single hralh tla ber chungchangah tul lovah a buai thui hle. Latin disco band Dr Buzzard original Savannah Band leh Florida reggae group Artikal Sound System te’n a lakah thubuai an siam.
Thla hmasa pawh khan Sam Smith leh Normani te chu 2019 kuama an duet, ‘Dancing With A Stranger’ chungchangah khin buai an ni a, Taylor Swift pawhin 2014 kuma an hla lar, ‘Shake It Off’ vanga Court thubuai a hmachhawn ve mek bawk.