- Mahmuaka Chhakchhuak
Kum 2023-ah khian Goa State-a Rajya Sabha seat khat an neih chu term a lo tawp dawn tak avangin inthlanna a awm dawn a ni awm a, anni ang bawk hian Gujarat State-ah seat thum leh West Bengal ah seat ruk te chu an term hman lai mek alo tawp dawn tak bawk avangin inthlanna neih a ngai dawn ni awm tak a ni. Chutiang bawkin State pakuaahte chuan Legislative Assembly term hman mekte an hun alo tawp dawn bawk avangin inthlanna neih a ni bawk tura ngaih a ni. February thlaah Tripura, Meghalaya leh Nagaland state-a sorkarna chang mek tute chu an term a tawp ang a, May thlaah Karnataka State, November thlaah Chhatisgarh, Madhya Pradesh leh Mizoram State-a sorkarna chang mektute term a tawp ve bawkin December thlaah Rajasthan leh Telegana State-a sorkarna chang mek tute term a tawp bawk ang. Hetianga an term alo tawp dawn takah chuan Inthlanna neih a ngai ang a, anmahni thlaktu tur (anmahni pawh thlang leh dawn tho pawh ni ila) thlan a ngaih dawn avangin General Election neih a ngai dawn a ni awm e.
Mizoram State bikah pawh tuna sorkarna fawng chelhtu MNF Party te term chu alo tawp ve dawn bawk avangin Inthlanna hi neih ngei a ni turah ngai ila, sorkar thar kan hrawn dawn nge ni ang a, sorkar ngai bawk kan la hrawn leh ang tih chu duhthlanna siam theitu mipui kuta awm a nih avangin vote tlate chhiar a nih hma chuan zawlnei lo tan chuan lo sawi lawk chu a har viau ngei ang. Rinthu leh ngaihdan erawh sawi a thiang a, tute emaw chuan sum leh pai tam tham tak lo inchawi awmta pawh nisela a sualna engmah a awm chuang lo a, ngaihdan nei thiam lote pawhin tanchhan tha tak an nei thei bawk ngei ang. Politics boruak hi zankhat thilthu pawha danglam thut thei a nih thin avangin a tak tak ram a thlen hma chuan lo ngaihthat ngawt theih pawh a ni kher lo ang a, boruak inthlak danglam ang angin emaw a thli tleh dan a zirin mipui lam chuan vote kan thlak mai thin ni pawhin a hriat.
Chutiang boruak a nih lai chuan vawiin atangin kan zoram Politics boruak chu a tha chho tan viau niin a hriat a, khawilai hmun hmunah emaw chuan inlawmluh boruak pawh a indawt zut bawk niin a hriat. Tunhnai lawkah pawh kan Party lian pathum hruaitute Chhim lam zin boruak chu zoram titi a tling chho vekin a bengvarthlak thin hle a. Party hruaitute zinna hmun apiangah thawm lian tak tak a awm thei zel mai bawkte hi anmahni zir vang nge ni a dawngsawngtu mipui lam zir vang zawk ni ang tih erawhchu hriatthiam har tak a ni awm e. Chutiang boruak bakah chuan Assembly House chhunga kan ram hruaitute tawngkam chu mipui lam chuan kan la sawi tui viau mai bawk a, tute emawni thusawi phei chu ngaihnawm ti takin kan la sawi mek bawk niin a hriat a. Fiamthu rawngkai lama sawizuina pawh ala chawl rih hleithei lo ni awm tak a ni bawk.
Party hruaitu leh worker te chauh ni loin mipuite ngei pawh hian kum 2023 Inthlanpui hi kan nghakhlel hle mai niin a hriat a, hei hi a chhan tam tak sawi tur a awm thei bawk ang. Hmun thenkhatahte chuan a fawng vuantu lam duhlohna pawh a lian tawh viau niin an sawi a, an MLA ngei ngei pawh a bial fang lo dawngsawng tha duh lo ni ang hiala sawi a ni bawk awm e. Hmun thenkhatah thung chuan Party pakhat atanga bial invil thuah an awmin Party lam hruaitu tan pawha thlan zawk tur leh hnawl zawk tur hriatthiam har tak an niin hnawl zawk tana boruak tha lo thlen phahna tur hial an awm nia sawi a awm bawk a. Hmun thenkhatah lah chuan hetia ngaih mai pawha beiseiawm loh tak leh tling lo tur tih chiang ngawih ngawih chunga taima taka bial lo vil ve bawk si a, midang tana lo inzeh rem tawh chiah bawk si lo an awm ni awm tak bawk a ni. A thente lah chuan din nawn an tum tawh lo emaw tih mai tura Arpui awp tha duh lo an sawi ang maia kanglang taka bial awp mek nia sawi an awm bawk a. Tak tak a nih leh nih loh lam chu hre chiah lo mah ila tun atang hauhin boruak chi hrang hrang chu hriattur a awm ta phawt chu a nih hmel.
Thenkhatin MLA nih an chak chhan an sawite hi a ropui lo viau mai bawk a, ram leh hnam hmangaihna lam hawi pawh a nih hmel lem loh. MLA pawh lo niin Assembly House chhungah han thu ve ringawt mahsela ram pum tan pawh ni lo, a bial enkawl tan pawha kutbenna tham thu a sawi chu sawi loh amah hrim hrimah pawh hmasawnna lam hawia beisei tur tam hmel vak lohte hi an la ni zui bawk a. Tuna sitting MLA zinga thenkhatte chu an dinna ngaiah hian an ding nawn leh ngam tawh kher pawha rin loh tur hi kutchang thleh ngauh ngauh tham an awm ni awm tak a ni bawk a. Kum 2018 inthlan hmaa mipui hriat tura intiamna thu tha leh lawmawm tak tak sawitu thenkhatte lah chuan an thusawi ang chiah kha an sawi nawn leh duh tawh hauh lo mai bawk avangte hian mipui lam chuan vote tawh loh turah an lo thlang chhuak mek ni awm tak a ni bawk awm e.
Kum 2018 kum tawp lam leh kum 2019 kum tir lama mothar tha an sawi ang maia zuanzang tak takte ngei pawh chuan vawiin thlenga an zuanzan peih tawh loh avangte hian mipui lam chuan ngaihdan tawk an lo nei thiam ve zel ni awm tak a ni a, kum 2023 chhoah hian zuanzang takin han che leh mahsela a sawt tawh kher awm lo mange tih tur hi an awm nual bawka hriat a ni. Ram mipuite tana hna tha tak thawk tura insawi sia vawiin thlenga an hnathawh hmuh leh hriat tur awm mang bawk silote hi anmahni thusawi hmang ngeiin mipuite hian na tak takin nakin lawkah hian an la vawm let ngei pawhin a rinawm. A bik takin thalai lamte chuan nasa lehzual zawka ram rawngbawlna hi an ngaihven tawh avang hian kum 2018 inthlan dawn hnaiha vote rawn zawngtute hi lo dawnsawn dan pawh an thiam tawh zawk ngeiin a rinawm a. Chiang taka sawi lawk theih pakhat awm chu mi tam takte chuan kum 2023 Inthlanah hian an vote loh turte hi an chiang tawh viau niin a hriat a, chungte chu sawi lang kher lo mah sela an hming erawh chu an chhinchhiah tha hlawm tawh viau nia hriat a ni.
Zui tlak hruaitu kan mamawhna hi sang tawh tak niin mi tam takte chuan an hria a, thenawm state leh hmun danga ram hruaitute hnathawh dan kan hriat ve thin bawk avang hian kan ram, kan pianna ram ngeiah hian tun aia hruaitu tha hi kan neih theih lohna chhan tur hi an hre bik lo a ni. Chutiang a nih avang chuan ram hruaitu zinga hnathawh tum tak tak lo te chu vote loh turah an dahin tun atang hian an hming nen lama lo chhinchhiah tawh hi nitina eichawp zawng zingahte, bazara thu thin zingahte leh zirlai zingahte leh hmun hrang hrangah hian mi tam tak an awm tawh nia hriat a ni a, hei vang hian Politiciante tan pawh namnul mai mai a rem tawh hauhin a rinawm loh.