Israeli venhim hnathawktute chuan Palestinian pakhat, Tel Aviv khawpuia bar-a awmte pawngkaha mi pahnih thattu leh mi 12 hliamtu chu an kap hlum ve tih Zirtawpni khan police-in an sawi.
An kah hlum hi West Bank-a ram an luah lai, Jenin-a miin a bul hnaia Jaffa khuaah chhui luh niin hetah hian kah hlum a ni.
A hma lawkin Tel Aviv-a kawtthler lun ber pakhat, Dizengoff Street-a Ilka bar chu bei chiamin Ningani zan zankhua khan umzui tawh a ni.
Ningani zana thil thleng hi tun hnaia Israel-a hetiang inbeihna thleng thar leh ber niin mi 13 zet an thi tawh.
Israeli venhim hnathawktuten an thah hi Raad Hazem niin kum 28 mi a ni a, pawi a khawihna atanga km 6 vela hla mosque bulah a biru a. Rei vak lo inkah tawhna a thlen hnuah an kap hlum a ni.
Amah zawnnaah hian Israeli police, army special force leh Shin Bet intelligence service-a mi 1,000 vel an thawk chhuak tih an sawi.
Israeli Prime Minister Naftali Bennett chuan an venhim hnathawktute an inring reng tih sawi lehin, “Firfiak takte nena kan inbeihna hi a rei tawhin a hautak a, kan hneh ngei ang,” a ti a. West Bank leh Israel inkalpawhna, Jenin bula mi chu thu leh awm hma chu khar turin a ti bawk.
Shin Bet chuan Hazem-a hian dan lovin Israel a lut a, hel pawl nena inkungkaihna a nei lo niin an sawi tih Times of Israel chanchinbu chuan a tar lang.
Palestinian President Mahmoud Abbas pawhin Israeli civil mite thah chu a dem thu a sawi a. “Palestinian leh Israeli civil-te thah hian kan inkar a tichhe tawlh tawlh zawk a ni,” a ti niin sorkar enkawl, Palestinian Wafa news agency chuan a tar lang.
Hetih lai hian Palestinian hel pawl, Gaza Strip thununtu, Hamas leh Palestinian Islamic Jihad chuan Ningani zana Tel Aviv beihna chu an fak thung.
Israel venhim hnathawktute chuan tun hnaia beihna hrang hrang a thlen reng avangin an inralring hle.
Thla hmasa tawp dawnah khan Palestinian pakhatin Tel Aviv daia ultra-Orthodox Jewish tamnaah mi panga a kap hlum a. A hma ni lawkin Israeli Arab pathumin hmar lama Hadera leh chhim lama Beersheba-a mi an beihnaah mi paruk an that a, hengah hian a beitute hi kah hlum nghal vek an ni.
Tun hi kum 2006 hnua Israel-a hetiang inbeihna a thlen tam ber hun lai a ni leh mek a. Kar tharah Muslim kûtpui, Ramadan a in\an dawn a, Judate Kalhlel Kût leh Kristiante tan Good Friday leh Easter Sunday hunpui a in\an dawn mek a, heng hunpuia beihna lian a thlen an hlau hle.
Tal aviv bar-a inpawngkahna
Israeli chanchinbute chuan Tel Aviv-a mi kaptu, Hazem-a hi Ilka bar kawtah hian minute 15 chuang a \hut hnuah Ningani zan dar 21:00 (India-a zan dar 11:30) pelhah silai a hmet puak niin an tar lang.
Hliam tuar zinga pakhat, Mark Malfiev chuan, “Hmar lam pana ka kal lai takin bar-a inkahna hi a in\an a ni,” tiin BBC a hrilh a. “Tukverh a inkhar \huai a, hmanhmawh takin mi an tlan a, ka hnung a rawn na ta a ni,” a ti a. “Hliam ka tuar tih pawh ka inhre mai lo va, kea kal mai ka ni a, ka thi a chhuak niin ka hria a, thisen ka hmu zui ta a ni,” a ti.
CCTV a\anga a lan dan chuan bar-a awmte hian thil an in a, chutih lai tak chuan silai riin an darh nghal vek a, an tlanchhiatna lamah \hutthlengte pawh an pal thlu nasa hle a. Video-a a lan dan chuan Dizengoff Street-ah hian mi an tlanchhe nasa a, emergency vehicle thlegin siren a ri ruai ruai bawk.
Thi pahnihte hi kum 27 mi ve ve, naupan lai a\anga inkawm tawh, Eytam Magini leh Tomer Morad te an ni.