Aizawl: National Highway 54 laih zauh leh siam that meka leimin avangin Chhiahtlang Hmar Veng-a chhungkaw pakhat chenna in chu luah ngam lohva awm mekin Inrinni khan bungrua pawh thiar chhuah a ni.
Thudawn danin NH 54 laih zauh mekah hian Chhiahtlang Hmar Veng huam chhunga nikum lama mual pakhat lo tan (laih) tawh chu tun hnai khan company-ten lai chhunzawm lehin, hemi avang hian a chhak lam ram chu chein lei a tawlh hret hret a, hei vang hian a chhak lama Vartluangkhuma te in, Assam type chu luah ngam loha awmin Inrinni khan khawtlangin an bungruate an thiar chhuahsak a ni.
In hi a dung ft. 24 leh a vang ft. 18 niin, puitling mi paruk an cheng mek a, helaia in neitute chuan NH 54 laih zauh leh siam thatah ram lak turte lak fel a nih hnuah helai hmunah hian in an sa tih sawiin, nikum March thla atanga sa tanin nikum November thla khan an in hi an luah luh thu an sawi.
An sawi zel danin, Ningani kalta khan lei hi rawn che tanin a rawn chet nasat zui tak avangin Inrinni khan an bungruate hi thiar chhuah a ni ta a. An in bula Sabbath Kohhran Biak Inah an bungruate pawh an vawm lut rih a ni.