- Zirsangkima

Bazar lùn lai takah chuan mi an zi luai luai a. Dàwrkai mai ni lo, an thil zawrh a khaia khai—dàwr khaiho te nèn lam chuan an thil zawrh chu hralh loh hlauin an zi mur mur mai. Dangdai deuh pakhat leh a thil zawrh ‘common’ lo deuh chu, chû bazar lùn lai piah deuha dàwrkai pakhat, Ui note zuar chu a ni.
A dàwr kawtah chuan, ‘Ui Note Sale!’ tih hi a tár kuau mai. A chhúngah chuan ui notê 10 chuang hi an báwmah a khung khâwm a. A khát tâwkin an ei leh in tùr a pe reng bawk a.Chu dàwr chu mi tam takin an kal pêl a; mahse, naupang lam deuh, ran làwmho chuan kal pelh mai harsa an ti \hin hle a, an thlír zui vawng vawng \hin.
Chumi chawhnu lama mipa naupang, a Ui zawrhna rawn pan ding chattu a hmuh pawh chuan chû dàwrkai chuan mak a ti hran lo.
‘Ka pu, i Ui notê-te hi eng zat man nge an nih hlawm le?’ tiin chû mipa naupang chuan Ui zuartupa chu a’n zâwt a. Chu pa chuan, ‘Chéng 1,500 a\anga chéng 3,500/- man te an ni hlawm …’ tiin a chháng a.
Mipa naupang chuan a iptê a\ang chuan a pawisa neih zawng zawng chu a phawrh fai leng a; a vaiin chéng 935/- chauh a nei si a! Ui note dahna báwm chu kâwkin chu mipa naupang chuan, ‘Ka pu, heti zawng hi ka pawisa neih zât chu a ni mai a; mahse, khawngaih takin i Ui notê-te hi min entír phal em?’ a ti a.
Ui zuartupa chuan a lu bûk nghut pahin Ui note dahna báwm chu a’n hawng a. Ui note duhawm tak tak chu an rawn inzui chhuak dam dam a; an hnungah chuan Ui note duhawm lo tak mai, a \hiante rual pawha kal hlei thei lo, kal bai auh auh mai chuan a rawn zui a. Chu Ui notê, pianphunga rualbanlo tih mai tùr chuan mipa naupang mit chu a la ta tlat mai! Ui note dang, duhawm êm êm, a \hen foreign a\anga chah luh tih hriat reng rengte pawh chu en tawh loin chu Ui notê, kal \ha hlei thei loah chuan a mit a fu ta chat mai a ni.
‘Ka pu, saw laia Ui notê saw engati bîk nge ni a?’ mipa naupang chuan a ti ta a.
Dàwrkai chuan a pian a dik loh dàn leh ran dàktawr-te sawi hmanga a dam chhúnga a kê bãi hlen tawh tùr a nih thu a hrilh ta a.
Mipa naupang chuan phûr tak leh hlim takin, ‘Sawtiang Ui notê ang chiah saw a nia ka lei duh chu!’ a ti ta mai a!
Dàwrkai chuan, ‘Sawtiang Ui, fuke dik loa piang chhuak, ke bai hlen tùr saw maw i sawi a?’ mak tih hmèl taka melh chungin chu mipa naupang chu a’n zâwt a. Mipa naupang chuan ‘Ni chiah e!’ a lo ti mai a.
‘Saw Ui notê saw i duh tak tak a nih chuan i lei a ngai lo ang, a thlàwnin ka pe ang che. Ka dàwr pawh a ti \awp mai mai a ni,’ dàwrkai chuan a ti ta mai!
Mipa naupang chuan thu tak êm êma dàwrkaipa mita en kal chungin, ‘Ka pu, a pêka inpêk ka duh lo e—a man i chhiar zah ang chiaha lei ka duh a ni. Mahse, tûnah hian heti zawng hi pawisa ka la nei a, rem i ti a nih chuan he Ui notê hi min hruai hàwtír la, thla tharah a man ka pêk daih lohna zât chu ka rawn pe leh ang che,’ a ti ta zêl mai si!
Dàwrkai chuan a tih ngaihna tak pawh a hre ta lo hial a. ‘Mama, i lei duh tak tak a nih chuan hei hi hria ang che: Saw Ui notê saw engtikah mah a ke leh a bawp saw a pangngai thei tawh dáwn lo a ni tih hi. A dam chhúngin tûna a kê bài dàn ang sáwn, a thih ní thlengin a bai tawh dáwn a ni. Daktawrte paw’n tih dam ngaihna an hre tawh lo. Tin, infiampui emaw han tlànpui vêl emaw pawh a thei ve dáwn miah lo a nia aw… ’ a ti chuai raih a.
Dàwrkaipa-in chutia mipa naupang Ui lei duh chanchin a sawi chuan mipa naupang chu a ti ngui chuang miah lo mai! Ui zuartu chuan mak a ti hle mai a. ‘Engati nge hetianga fuke dik loa Uitê hi i duh tlat le?’ tiin a zâwt ta hial a.
Chu mipa naupang chuan eng dang sawi loin a kekawr tlâwn chu a hlîm chho ta a.
‘Ka pu, infiampuia han tlànpui vêl thei tùr ka ni bîk rêng rêng hleinêm. Keimah anga kal pangngaia kal thei lo, he Ui note hian Ui dang zawng zawng aiin ka chak lohna hi a hre thiam chiang êm êm dáwn a tin ni,’ chu mipa naupang chuan a ti ta reuh a.
Dàwrkaipa chuan mak ti êm êmin mipa naupang ngal leh ke chu a’n en chiang a. Mihring pangngai ke ang rêng rêng a lo hmang hauh lo mai a lo ni a! A bawp leh a ke-ah chuan thîr an lo dah \up mai a; chû thîr vuah chawp hmang chuan dam chhúng a kal bai auh auh tawh dáwn hi a lo ni a.
~
Kan chak lohna leh tlin lohna min hriatthiampui \hintute leh kan dinhmun chhe tak leh thlanawm loh taka min dinpui duhtute hian hmangaihna rimtuizia leh thlumzia hi a takin an tawng chiang bîk \hin a lo ni. Kan dinhmun thlanawm lo tak maia ding ve a, kal nána ke ni loa thîr vuah chawp min bunpui duhtute hian a ni, kal dàn dik min kawh hmuh \hin ni.
Fel loa din, tling loa sei lian mihringte hian, kan fel lohna leh kan tlin lohna min hriat thiampuitute hi kan ngai ber \hin a; he khawvêla kan chènpui mihring tluklehdingâwn tam tak zínga kan mamawh berte an ni \hin. Tù mah hi inchhuanga induha intivei thei kan ni lo a; chutih rual chuan indah hniama kun ngawih ngawiha beidawng tùr pawh kan ni hek lo. Keimah anga chak lo, keimah anga mi derdêp hi, khawi maw laiah an awm ve a nia—kei aia chak lo pawh!
Mi dang hriat thiamna nei tùr hian vawi eng zât teh meuh nge maw an dinhmunah hian ka lo indintír ve tawh ngai le, tiin ka inzâwt \hin a. Ka nun ka inen chiana ka inchîk apiangin ka zak \hin!