- C. Lalramdinzela, Mamit
Mizoram Journalists’ Association (MJA) Mamit District chuan Ni 6-9/4/2022 chhung khan Champhai District chhunga Horticulture Department hmalakna hrang hrangte an tlawh a, member tlemte kal zingah ka tel ve kha ka lawm hle a ni.
Champhai District chhunga Horticulture Department ten kuthnathawktute inkhaichhuahna tura hma an lakna hrang hrangte awhawm viau hlawm mahsela, sik leh sa inang lo avangin khawtlang lamah chuan “tive ang aw” tih ngawt theih a ni lem lo a, kuthnathawktute leh department hlawhtlinna bakah, an kal zelna tura tul leh pawimawh nia ka hriatte ka’n thailang ve ang a, sawrkar lam pawhin a bengkhawn a tul viau awm e.
Hnahlan khuaah kuthnathawktuten Grape an ching nasa hle a, hun kal tawha chhungkaw mal ngawt ni lo, khawtlang innghahna, kawng hrang hranga hmasawnna rahbi rahtirtu a lo ni tawh a ni. Sawrkar hmalakna then khat leh kalphung duan avanga hnual chang, beisei bo riaua inhriat chang neiin an tha han thum deuh thin mahsela, tun dinhmunah rilru thar nen tan an la chho leh mek a, rei loteah a hlawhna nasa takin an tel leh dawn niin a lang. Hnahlan khuaah hian Grape Grower & Producer Association ah member 250 zet awmin anni hian theih tawp an chhuah a, kum 2019-2021 chhung khan Association memberte hian Rs 81,00,000/- (nuai sawm riat pakhat) zet an thawk chhuak a ni. Hei hian Association member tan chuan innghahna tlak a nihzia a tilang chiang viau.
Hnahlan Grape chingtute leh Grape wine siam chhuaktute lakah sawrkar leh pawl hrang hrang, Kohhran leh mipui pawhin kan ngaihdan her danglam hret a tul chang a awm mai thei. Sawrkarin department kaltlangin Grape a chin tira, a rah chhuah awmze neia sawngbawl a ni a, chu chu an eizawnna a ni. An chawthleng bengbaw lo zawnga awmze neia kan kalpui thiam a tul awm e. Chu chu hmasawnna kawng zawh tura kan mipui kan tanpui theihna nasa tak a ni ang.
Ngur khuaah Sapthei an ching chho leh a, chhungkaw 20 zetin eizawnna bul tannan an hmang mek a ni. Hun kal tawhah Ngur khua hian an sapthei thar chhuah tihral kawngah harsatna an lo tawk tawh niin an sawi. Hetiang ang harsatna thleng thei leh kuthnathawktute rilru tihnual thei pumpelh turin an thlai tharchhuahte a tihralna tur kan hmuhsak hmasak phawt a tulzia a lang a, a tutea mah lunghnura siam lo tur leh an thawhrimna rah a nihna anga an seng theihna tura an thlai thar tihralna tur kan hriatsak ngei ngei a tul a ni.
Tuipui lamah Tomato, Dungtlang lamah Apple an ching bawk. Heng zawng zawng hian an vawiin dinhmunah an hmalakna chhunzawm zel tlak niin an ngai a, an hmalam hun a eng zawnga thlira beiseina sang tak an neih hi a hlawhtlinna an hmuh ngei theihnan sawrkar pawhin nasa zawka ngaihtuahna a la sen a tul in a rinawm.
Sawrkar inthlak thleng apiangin policy kalpui a danglam a, mipui thleng phak tur programme kan kalpui kawngah ngaihtuahna thui zawk hman a tul. Kuthnathawktute inhai kuak ve theihna turin thlai chin lam kan kalpui uar hle a, a boruak, sik leh sa awm dan zir chiang a, chumi mil tur, a ngeih tur thlai kan thlan thiam a tul. Tun tuma khawchhak lama thlai tha duh tak tak hi khawtlang lamah a tha ve kher lo ang. Kan innghahna Kuhva hi khaw chhak lamah a beidawn thlak viau thei. Chutiang zelin, thlai kan kalpui tur reng reng, a that duhna hmun tur ngaihtuah chunga hmalak nachang hriat a pawimawh em em a ni.
Thil pawimawh tak pakhat chu, hmun hrang hrangah thlai chi hrang hrang, inang lo tak tak chingtu mi tam tak an awm a, heng mite hian an theihna zawng zawng nen hlawhtlinpui tumin an lo bei tawh thin a, hlawhtlinna hmu an awm tawh a, an awm mek a, an la awm zelin a rinawm. Sawrkarin kuthnathawktute dinchhuahna tura hmalakna tur a kalpui reng rengah, Party Party sawi loin, tih tak taka hmalakna a taka lo kalpui tawhte leh kalpui mek tute a tanpui leh a chhawmdawl hi hlawhtlinna tur kawng pawimawh a ni. Hetiang zawnga inchhawmdawlna leh tanpuina kan kalpui theih chuan, kan sawi fo kuthnathawkten “lei rem an rap” tih hi a takin kan hmu ngeiin a rinawm tlat a ni.