Prime minister atanga paih thlak tak, Khan chuan Thawhtannia National Assembly-a amah thlaktu tur thlan hma lawkin rorelna ina member a nihna atanga a bânna a thehlut a. ‘Rukrute’ nena rorelho a duh lo niin a insawi.
“Rs. tluklehdingawn 16 zet ei ruk thubuai nei leh a danga Rs. tluklehdingawn 8 zet ei ruk thubuai nei bawk mihring chu prime minister atana thlan tura chhawp chhuah a ni a, hei aia ram hmuhsitna lian a awm lo. National Assembly atangin kan bâng,” tiin Khan hian a sawi niin PTI chuan an Twitter account-ah an tar lang.
Prime minister tur thlan hma lawk hian interior minister hlui ni ta, Sheikh Rasheed pawhin an party mite an bân vek thu hi a sawi bawk.
“Imran Khan-a hian parliamentary party meeting-ah ka rawtna chu a pawm a ni,” tiin Khan-a hian Nilainiah Peshawar a tlawh dawn thu a sawi bawk.
“Imran Khan hian Pathianni tin mipuite hnenah ram dang atanga phiar a nihna hi a puang dawn a ni,” a ti.
PTI member zingah hian Murad Saeed chu National Assembly member a nihna atanga banna thehlut hmasa ber a ni a, speaker hnenah a thehlut niin ARY News chuan a tar lang.
PTI hian Thawhtanni chawhma khan Islamabad-a Parliament House-ah parliamentary party meeting an nei a. Khan-an a kaihruai nghe nghe a ni.