European champion lai in an lallukhum humhim tura ke an penna tihtawp a ni a. Spain-ah Chelsea hian inkhelah hnehna chang mahse aggregate result in Real Madrid lakah an tlawm.
Santiago Bernabeu-ah Chelsea hi tling zawk thei dinhmunah an ding a, mahse Real Madrid tan Rodrygo leh chhandamtu ngai bawk Karim Benzema ten goal an khung avangin Los Blancos hi 5-4 aggregate in an tling.
Blues an teuh
Madrid khawpui a inkhel hmuhnawm leh ropuiah Chelsea hi first leg-ah 3-1 a tlawm an nih avangin an tan inkhel pawimawh a ni a. An hai lova, an bul \an dan duhthusam a ni ang.
Mason Mount chuan a hun takah a thiamna lantirin minute 15-naah goal hmahruai mawi tak maiin a khung a. Halftime hma in khung belh lo mahse second half \an hnu lawkah Antonio Rudiger chuan an goal hnihna \ha takin a tauh lut.
Thomas Tuchel-a pawlte hi inkhel \an a\angin a chungnung zawkah an \ang fova, minute 75-naah Timo Werner chuan goal khung lehin Chelsea in semi-final boruak an hip hman.
Mahse a tawp thleng erawh an \ang zo lo. Substitute Rodrygo chuan Luka Modric-a ball pek duhthusam chu goal-ah khungin extra time khelh a ngai a. Hun pekbelh an khelh \an a\anga minute 6-naah first leg a an team nghaisatu bawk Chelsea mittui ti tlatu a ni a. Karim Benzema chuan an chakna goal tauh lutin Blancos an lawm.
Benzema hi inkhel hun pangngaiah goal bar tauh per tawh a ni a, a goal khung loh zan a ni dawn nia a lan hnuah vengtu nei lova a awmlai tak chu remchangah a la. Chelsea hian huntawp hma in Hakim Ziyech, Kai Havertz leh Jorginho te hmangin an si phurh sut teuh mahse penalty shootout a chak zawk zawnna an thlen tir thei lo.
Tuchel a lawm vek lo
Chelsea manager Thomas Tuchel chuan inkhel zawhah an inkhel enkawltu referee leh Real Madrid boss Carlo Ancelotti te titi dun chu mawi lo a tih thu a sawi.
“Sawi hun a ni lo viau chuan ka hre tho a, mahse minute 126 chhung theihtawp chhuah chunga tlin zawh loh hnuah va chibai ka tum lai takin lehlam manager nen an lo nui dun ka hmu a, kha kha a hun lo hle in ka hria.” a ti.