Depression i neih chuan heng a hnuaia mahnia inenkawl dan tur tlangpui kan sawite hi uluk takin lo zawm la, tuna i dinhmun aia hlauhawma lut lo turin a veng ngei ang che.
Nangmah kher lo, i thianten depression an nei nia i hriat chuan puitu tha tak i ni nghal thei bawk ang.
Ngaihtuahna Thunun
Media khawvela hriatlar tak, Oprah Winfrey khan “I rilru put dan i thlak danglam chuan i hmalam pawh i thlak danglam thei a ni,” a lo ti a.
Rilru hnual (depression) lan chhuah dan pakhat chu thil thlir dan dik lo tlat hi a ni. Sap tawng takin, negative hlirin thil an thlir thin.
He negative thlirdan hi logical taka thil ngaihtuahna hmangin i hneh thei. Mi zawng zawngin an hua che em? I hmalamah thil tha engmah a awm tak tak lo maw? Hetianga ngaihtuah-na tha lo zawng zawng hi uluk taka thil ngaihtuahnain i do hneh thei a ni.
I Hmathlir Kha Hre Reng Rawh
Depression neite chuan an beisei leh tum pawh an ngaihtuah hlei thei tawh lo. Chutiang karah chuan i hmalama i thil tum, tih tura i lo hmachhawp tawh kha huai taka tih tum rawh. I thil tum atanga i rilru lapeng tur zâwnga ngaihtuahna tha lo lo thleng thinte kha ngaihtuahna mai an ni tih hriain ngaihtuahna tha zawka hneh tum zel ang che.
Nuih Fo Tum Hrim Hrim Rawh
Nuih hi hriselna a nia. Nuih tum fo hi a tha. Depression tan phei chuan damdawi tha tak a ni. Hman lai Greek mi fing Epictetus chuan, “Mahni intinui theite hi chu an hlim reng bik dawn a ni,” tiin a lo sawi daih tawh a nia.
Thil Tih Dan Tur Tha Insiam Rawh
Rilru a lo hnual a, hlauthawnna a lo thlen pawhin i hna pangai kha tha taka thawh tum la chu chuan a chhan chhuak thei ang che. Tin, mut hmaa lehkha chhiar te, naupangte nena han awm hlim vel te pawh hi a tangkai hle. Tih tur holam tê tê – thleng sil, walking, etc – te pawh ti la rilru a thawveng duh em em a ni.
Chhuak Vak Ve Deuh Rawh
Mahni chauhva awm hi chuan indawm kun tlawk tlawk hi a awlsam reng reng a. Pawn lama chhuah vaha, ni eng mawina te, chhehvel mawina te thlira vah khawthawn hun insiam te pawh hi depression chhawkna tha tak a ni.
Inah Tawm Reng Suh
A chunga kan sawi ang deuh khian ina awm mai mai, TV hmaa thut reng ringawt a, chanchin tha lo pui pui ngaihthlak rengna hian depression a tizual duh hle a. Taksa tan pawh a tha lo.
Ni khatah darkar chanve emaw vel tal exercise la thin rawh. Hei hian taksaah anti-depression a siam a, rilru a tiharhvang tha bik a ni.
News Bih Lutuk Duh Suh
News hriat tam tum lutuk pawh hi a tha ber chuang lo. Mi hlim thei pangai takte pawh news tha lo lam an hriat ngun lutuk chuan an hlim lo duh hle. Depression i neih phei chuan news (lawm awm a awm ngai mang lo va!) hi bengkhawn vak lo la, a duhawm zawk.
I Thiante Be Rawh
Depression awm chhan chi hrang hrang a awm a. Chûng zawng zawngah chuan rilru lama fuihtu mamawhna a awm vek. TV leh mobile phone game khel kual vel mai mai lovin i thiante kha bia la, i rilrua i vei chi hrang hrang kha hrilh rawh. Chu chu i tan chauh ni lovin in pahnih tan thil tha tak a ni.
Online lama inbiak chauh ni lo, i tlawh pawh theih an awm chuan va lengin va kawm la, thingpui dawrah te thutpui la,. I theih anga tam i thiante kawm ang che.