Mara Autonomous District Council (MADC) inthlanpui lo awm tur atan political party hrang hrangte chuan an party official candidate tur nimin khan an puang a. BJP Mizoram Pradesh leh Indian National Congress (INC)-in MDC bial 25-ah candidate an neih vek laiin, ZPM erawhin bial riat-ah an chauh an chuh dawn thung.
BJP State Atal Bhawan-ah thu thar thehdarhtute hmaah BJP Mizoram Pradesh President Vanlalhmuaka hian May 5, 2022-a MADC General Election lo awm tur atana BJP official candidate-te a puang a, MDC bial 25 awmah an chuh vek dawn a. Ticket an pek zingah hmeichhe candidate an awm lo a. Hetih lai hian MDC ni lai zinga mi pali ticket pek an ni lo.
BJP candidate puan zingah hian MDC ni lai 13 leh a thar 12 an awm a. Hetihlai hian MDC ni lai zinga mi pali – Tipa-I MDC leh EM ni lai, FC Lawmkima chu ticket pek a nih loh avangin Congress party zawmin, a party zawm thar a\angin a chuh dawn a. Siaha Vaihpi MDC ni lai, K Chiama chu \halai zawkte kian turin a chawl a; Tipa II MDC leh Advisor to CEM ni bawk, Siakhai chu ticket pek a ni lo bawk a. MDC chairman ni lai, H Sahlo pawh ticket pek ni loin, a aiah a fapa ticket pek a ni thung.
BJP State President Vanlalhmuaka chuan MADC inthlanna neih tura BJP party official candidate-te hi District Search Committee-in hming chhawp chhuakin, State Election Committee-in thlir ho lehin, chumi hnuah BJP National President-in a pawmpui tura theh luh leh a ni a, pawmpui a nih hnuah an puang thei chauh tih a sawi a. Nimin zing khan candidate tura chhawp chhuahte pawmpui an nih hnuah an puang nghal tih a sawi.
MADC inthlan lo awm tura BJP party dinhmun tur thu thar thehdarhtute zawhna chhangin Vanlalhmuaka chuan, “Mipui kutah kan innghat a. Sorkarna chang turin kan inbeisei lo ni loin, kan rorel dan \ha an tih chuan kan tling ang,” a ti.
Vanlalhmuaka hian, “Tun \um MADC inthlan turah hian hmeichhe candidate kan nei ve dawn lo a. Hmeichhe candidate tur hi kan thlir a, kan en bawk. Mahse, anmahni hian tling zo lo tura an inngaih avangin kan dintir leh ta lo a ni,” tiin zawhna a chhang.
Nimin vek khan Siaha Tourist Lodge Conference Hall-ah MADC General Election lo awm tur atana ZPM Party Official Candidate-te chu K Sapdanga, Working President-in a puang.
He hunah thu sawiin K Sapdanga chuan, “MADC General Election hi ZPM chuan kan chuh ve vawi khatna tur a ni a. ZPM tel loin MADC inthlan hi vawi 11 zet a lo awm tawh a. Tun \um, a vawi 12-naah kan han tel ve ta a. A vawi khatnaah heti zat seat luah theia kan awm hi a ropui kan ti a, hmasawnna kan hmuhah hian kan lawm em em a ni. ZPM chuan sum emaw, kuttlinglo therhlo dang kan hmachhuan dawn lo a, MPF duh dan leh ram dan kan ngai pawimawh dawn a ni,” a ti.
ZPM hian Tokalo, Laki, Saikao, No-aohtlah, Siaha North-I, Siaha South-I, Siaha East-II leh Siaha West-I bialah te an chuh dawn a ni.
Hetih lai hian Mara District Congress Committee pawhin MADC inthlanpui lo awm tur atana an party official candidate-te nimin khan an puang a. MDC bial 25 awmah bial hnih, Siata leh Laty-ah candidate hming tar lan a ni ve lo. MNF pawhin April 12, 2022 khan Siaha-ah MNF Vice President Vanlalzawma’n a lo puang tawh bawk.