Auto Corner
by Ruata
Japanese bike siamtu lar leh hlun Yamaha chuan an lirthei chhuak mek te an rawn tuaithar a, MT-15 chu Version 2.0 an tlangzarh a, R15 special edition Yamaha YZF-R 15M World GP 60th Anniversary Edition an tlangzarh bawk.
Yamaha MT-15 Version 2.0
Yamaha R15-a version hrang hrang kan hmuh ang bawk hian Yamaha chuan an naked bike mawi tak mai MT-15 chu a version thar version 2.0 an tlangzarh ta a, he bike hi cheng nuai 1.60 (ex-showroom, Delhi) man a ni dawn a ni.
MT-15 V2.0 ah hian a part thenkhat leh a landanah thlak neuh neuh leh tihthar neuh neuh a awm a. A khawl lamah chuan a khawl ngai 155cc, single-cylinder, liquid-cooled khawl a la hmang a. He khawl hian 10,000rpm ah 18.4hp power a pechhuak thei a. 7,500rpm-ah 14.1Nm torque a pechhuak thei bawk a. Transmission lamah chuan 6-speed gearbox a nei a ni.
A hmaa mi nen khaikhina thil inthlak hi tarlan tawh angin a awm neuh neuh a. Tunah chuan MT15 V2.0 thar hian rangkachak rawng upside-down fork a nei tawh a, a inner tube hi 37mm a ni bawk a ni. Hei bakah hian Yamaha chuan MT-15 boc section swingarm kha an rawn thlak tawh a, hei hi “MotoGP-inspired” aluminium swingarm in an rawn thlak a ni. MT-15 Version 2.0 hian fully digital, LCD display design thar a rawn nei a. Yamaha chuan rawng thar pahnih – Cyan Storm leh Racing Blue an rawn dah thar bawk a. Tuna rawng awm sa mek – Ice Fluo-Vermillion leh Metallic Black rawng te a rawn belh dawn a ni.
MT-15 thar hian a hmaa mi ang thoin single channel ABS a la nei a. Tuna V2.0 lo chhuak ta hi dual channel ABS dahna remchang a nih tehlul nen Yamaha chuan hun lo an la ti te pawh a ni rih ang e. Yamaha MT-15 Version 2.0 thar hia chhuak mek aiin Rs. 13,000 in a to zawk a ni.
Yamaha YZF-R 15M World GP 60th Anniversary Edition
Lirthei ke hnih nei intlansiaknaa kum 60 a telna pualin Yamaha company chuan Yamaha R15 thar YZF-R 15M World GP 60th Anniversary Edition an tlangzarh bawk a. He bike thar mawi tak hi Rs. Nuai 1.88 man (ex-showroom, Delhi) man a ni.
He anniversary edition bike thar hi Yamaha ho rawng lar tak – white & red ‘speed block’ rawnga duan a ni a. Alloy wheel leh a hma fork rangkachak rawng a nei a, a fuel tank pangah special badge a nei a, lever dum a nei bawk a ni.
A khawl leh a siamphung lamah chuan World GP 60th Anniversary Edition hi tuna chhuak mek R15 nen a inang tlangpui a. 155cc, four valve, single cylinder, liquid cooled khawl a hmang a, he khawl hian 18.4hp power leh 14.2Nm torque a pechhuak thei a ni. Yamaha R15 World GP 60th Anniversary Edition hi tuna chhuak mek Yamaha R15M aiin Rs. 5,000 in a to zawk a ni.
Yamaha hi Mizoramah pawh dealer mumal taka awm lirthei tha tak tak siamchhuaktu leh hralhchhuaktu an ni a. Tunhnaiah pawh an scooter thar lian leh chak tha tak mai Yamaha Aerox chu a leiduhtuten an la inchan lo viau a ni. Yamaha atanga bike thar pahnih, a chhuak mek tuaithar leh a chi dang ‘special’ deuh tihchhuah te hi sports bike ngaina tan chuan thu lawmawm tak a ni a, a lei duh turtle tan pawh chet lak nghal vat vat a ngai awm e.